Kolkata, Jymmang 25: Ka lympung ïalehkai phutbol kaba la rim tam jong ka dewbah Asia, ka IndianOil Durand Cup, kan sa wanphai biang ha ka sien pynlong kaba 134 bad ha ka sien kaba nyngkong ha ka histori ba kin don 5 tylli ki jylla ban ïoh pynlong ïa ki jingïalehkai, ha kaba ka nongbah jong ka Manipur, ka Imphal, ka la wanphai biang hadien ar snem. Ka Organising Committee jong ka Durand Cup ka la pynbna ruh ïa ki tarik ban sdang ïa ka lympung mynta u snem ban long hapdeng ka 22 tarik u Naitung – 23 tarik u Nailar, 2025.
Ka Kokrajhar ha Assam kan pynjlan ïa ka kyrdan jong ka kum ka jaka pdiang ïa ka Durand Cup mynta la lai snem lynter katba ka Jamshedpur ha Jharkhand bad ka Shillong ha Meghalaya kiba la ïoh pdiang ïa ka Durand Cup ha u snem ba la dep kin ïohbiang ïa ka lad ban pynlong ïa ki jingïalehkai ha ka sien kaba ar.
Kane ka lympung kaba la don da ki spah snem ka la kynriah ïa ka jaka ïalehkai jong ka sha Kolkata – ka Mecca jong ka phutbol India, bad ka nongbah jong ka West Bengal, na Delhi mynshwa ha u snem 2019, bad, kan dang ïai bteng ruh ban bat ïa kata ka kyrdan hynriew lynter.
Naduh ba la rung sha ka thaiñ Mihngi, ka Durand Cup ka la ïoh biang ïa ka burom kum ka lympung ba pawnam eh jong ka ri, da kaba kiew na ki 16 tylli sha ki 24 tylli ki kynhun, kynthup ïa ka jingïashim bynta na baroh ki kynhun jong ka Indian Super League (ISL).
La pynlong ïa ka da ka Eastern Command jong ki shipai India na ka bynta ki lai tylli ki kynhun shipai, kane ka lympung ka long kaba kyrpang ha ka jingmut ba ka pynïalehkai ïa ki kynhun shipai pyrshah ïa ki klob phutbol ba tbit tam jong ka ri India bad ha kine ki ar tylli ki snem ba la dep, ka la sakhi ruh ïa ka jingïashim bynta jong ki kynhun shipai na ki ri ba marjan.
Ka tnad shipai India ka la pynpaw ruh ba ka jingthmu ban pynïar ïa kane ka lympung ha kylleng ka thaiñ Mihngi bad Shatei Lam Mihngi mynta ka la paw pura da kaba jied ïa ki nongbah ban pynlong ïa kane ka jingïalehkai mynta u snem.
Mynta u snem baroh ki don 6 tylli ki jaka ïalehkai, ar tylli ha Kolkata (Vivekananda Yuba Bharati Krirangan bad Kishore Bharti Krirangan) bad kawei kawei ha Imphal (Khuman Lampak stadium), Ranchi (Morhabadi Stadium) lane Jamshedpur (JRD Tata Sports Complex), Shillong (Jawahar Lal Nehru Stadium) bad ka Kokrajhar (SAI Stadium) kiba la buh kyrpang na ka bynta ban pynlong ïa ki jingïakhun jong ka 134th IndianOil Durand Cup.
Ka North East United FC ka dei ka lahduh ba bat ïa ka burom hadien ba ki la jop ïa ka Mohun Bagan, kaba la bat ïa ka nam lahduh kaba bun tam, ha ka final jong u snem ba la dep ban ïoh ïa ka khusnam lahduh kaba nyngkong eh jong ka klob.
