Ha u Nailur lah ban aiti noh ka Urban Affairs ïa ka Blueprint ban pynkynriah ïa ki Kharmetor

Shillong, Nailar 28 : Ka tnad Urban Affairs la kumno kumno ha u bnai ban wan ka lah ba phah noh ïa ka blueprint na ka bynta ban pynkynriah noh ïa ki longiing na Them Ïewmawlong sha kawei pat ka jaka ba la pynkhreh.
Ki ophisar na katei ka tnad ki ïathuh ba ïa ka blueprint yn sa phah sha ka High Level Committee (HLC) ban khlieh da u Symbud Myntri Rangbah ka jylla ha ka sien shong kaban sa long biang ha ka taïew ba nyngkong jong u Nailur.
Dang shen ha u Nairung mynta u bnai, u MLA ka Shillong West, Bah Mohendro Rapsang ryngkat ka Dorbar Shnong Mawbah ki la pynpaw ïa ka jingpyrshah kaba khraw halor ka jingthmu jong ka sorkar jylla ban ai jaka ha RP Chest Hospital na kabynta ba pynkynriah ïa kitei ki brïew kiba sah ha Ïew Themmawlong ha katei ka jaka.
Hynrei, hadien pat ka sorkar jylla ka la pynshai ba ka jaka ha RP Chest Hospital kadei kawei na kiba bunki jaka ba la jied ym dei ba ka la rai khatduh ban pynkynriah noh ïa ki sha katei ka jaka. La bthah ruh ïa ka tnad Urban Affairs ban kdew sa ar ne lai tylli ki jaka ha katei ka blueprint na ka bynta ban pynkynriah ïa kitei ki brïew na katei ka jaka.
Ki tyllong khubor na ka sorkar ki ïathuh ruh ba u Myntri Rangbah ka Jylla ryngkat u Symbud Myntri Rangbah ki la dep ruh ban kynduh ïa u Myntri ka tnad Ïada Ri, u Rajnath Singh na ka bynta ban aiti noh ïa ka jaka ba ar akar shiteng ka jaka shipai sha ka sorkar jylla. Katei ka jaka kadei kaba don marpyrshah bad ka Them Ïewmawlong. “Kane ka jaka kadei kaba la jied ban shna ïa ka jaka sah na ka bynta kitei ki paidbah. Ka sorkar ka la thoh sha ka tnad shipai bad la kyrmen ban ïoh ïa ka jubab kaba seisoh,” ong ki tyllong khubor.
Dang shen wat na ka liang ka Harijan Panchayat Committee ruh ki la pynpaw ïa ka jingbym sngewtynnad ban shah pynkynriah sha Mawbah.Na ka liang u nongïalam ka HPC, u Gurjit Singh u la pynkynmaw ba ha ka 25tarik u Ïaiong ka HPC ka la mynjur ban pynkynriah noh ïa ki na Them Ïewmawlong halor ki kyndon ba ka sorkar jylal kan pynbiang ka jaka ba 200 square meter sha baroh ki 342 tylli ki longiing hapoh ka European Ward nalor ba kan sïew ïa ka bai shna iing shna sem.
“Hynrei ka jaka (hajan RP Chest Hospital) kam hap shuh ha European Ward. Kumta, ngin sa ïa kren ïa kane ba katkum ka rai ba ngi shim, ngi dawa ba ka jaka dei ban ai ha European Ward,” ong u Singh. Lah ruh ban pynkynmaw ba na ka liang u Symbud Myntri Rangbah u la ïai ban ba tang shu dep ka blueprint ka HPC, kin sa shong ïa ka jingïalang bad ka HPC ban ïakren biang halor katei ka mat.