Ha u Myntri Rangbah ai dorkhas ka Wahkaji-Mawnore C&RD Block Demand Committee

Mawkyrwat, Risaw, 14: Ka Wahkaji-Mawnore Community & Rural Development Block Demand Committee mynta ka sngi ka la ïoh ban ïa kynduh ïa u Myntri Rangbah ka jylla, u Conrad K. Sangma ban dawa ban pynïoh ka C&RD Block ha ka thaiñ Wahkaji-Umdohlun. Kane ka jingdawa block kam dei shuh kaba thymmai hynrei kaba la long naduh ka snem 2012 hynrei kam pat urlong satia.
Kumta kum ka kynhun kam ban se ka la leit biang ban ïa kynduh syndon ïa u Myntri Rangbah ka jylla halor kane ka bynta bad la pynpaw ruh ba ha katei ka thaiñ ki don 3 tylli ki GS Circle kaba kynthup ïa ka Warsan Lyngdoh GS Circle, ka Phlangdiloiñ GS Circle bad ka Umdohlun GS Circle bad hapoh kine ki lai tylli ki Circle ki don ki shnong kiba hap ban ïaid haduh 80 – 100 km da ka kali ban poi sha Mawkyrwat bad Ranikor Block, kumta ka la wanrah ka jingeh kaba khraw ïa ki paidbah haba ki pyndep ïa ki kam jong ki.
Namarkata, ka kynhun ha kane ka jingleit ban ïa kynduh ka don ka jingsngewkmen bad jingkyrmen ba na ka liang u Myntri Rangbah ula shimkhia ïa kane ka kam bad u bthah ïa u Chief Secretary ban peit bniah ïa kane ka kam kloi kat ba lah. Ha kajuh ka por ka liang jong ki ki pynpaw ruh ka jingsngewnguh ïa u Myntri Rangbah uba la shah shkor bha ïa kane ka jingdonkam u paidbah.
La ong shuh shuh ba ka Block Demand Committee kan sa leit ban ïa kynduh ruh ïa ka Deputy Commissioner, South West khasi bad ïa u Minister In-charge C&RD Block ban pynsngew ha ki halor kane ka juh ka mat jingdawa khnang ba kan long ka jingmyntoi ym tang ïa uwei ne ar ngut hynrei na ka bynta u paidbah ba bun balang.
Kane ka long katkum ka kyrwoh khubor na u bah Zandy Myrthong, Spoke Person jong ka Block Demand Committee bad bah Christopher Lyngdoh, Secretary jong ka Block Demand Committee.