Ha U Myntri ka tnad pule puthi ka sorkar jylla phah tuklar ki seng NEHU ban phah wan shimti ne hiar shuki ïa ka Pro VC

Shillong, Kyllalyngkot 12: Ka NEHUSU, KSU Unit, NEHUNSA, NEHUTA bad kiwei kiwei ki kynhun ba don bynta lang, kila leit ïakynduh ia u Myntri ka tnad pule puthi ka sorkar jylla u Ma Lahkmen Rymbui, ban kyrpad ba un pynthikna ba ka Pro-VC ka Tura campus kan wan noh sha Shillong Headquarter.
Kane ka jingkyrpad kala mih na ka jingpep wan trei kaba la 422 sngi jong u Vice-Chancellor Prof. Prabha Shukla. Kane ka kynhun kala maham ruh ba lada ka Pro-VC kam lah ban shimti ïa la ka kamram, ka dei ban hiar shuki noh, ban ailad ïa kiwei pat ki Professor kiba la ih ha ka kam ba kin shimti kum ki Acting VC.
Haba ïakren bad ki nongpathai khubor hadien bala wai ka jingïalang, u President ka NEHUTA Prof Lakhon Kma ula ong, “Ngi lah ïakynduh ïa u Myntri ka pule puthi ban pynpaw ïa ka jingbynniaw kum ka skulbah. Ym shym la don VC ne u Pro-VC, Registrar, ne Finance Officer, ym don mano mano ruh bad ka skulbah kala ïaid da ka ‘Auto pilot Mode’ ha kaba ym don mano mano ruh kiban shim ïa ki rai”.
U Prof Kma ula banjur ba ki kyndon treikam kila kdew shai ïa ka lynti jong ka jingshimti, ha kaba ka Pro-VC ka lah ban shimti ïa ka kam ban pyndep ïa ki kamram ha ka jingbym don ne jingpep jong u VC. Hynrei ka Pro-VC, ka Prof F Marak, kam shym la ai jingtip eiei sha ka Shillong Headquarter watla lah bthah ïa ka ban leh ïa katei.
“Ka jingbahkhlieh kadei ha ka, ba kan wan ban pyndep ïa ka kamram jong u VC ha Headquarter. Lada kam kwah, ka dei ban hiar shuki noh na ka kam kum ka Pro-VC Tura campus,” ong u Prof Kma haba bynrap, ba ki seng ba don bynta lang ha ka kam kila phah ïa ka jingthoh sha ka ha kine ki 15-20 sngi kiba la dep, hynrei kala jied ban ym jubab eiei.
“La kyntu ïa u Myntri ka tnad pule puthi ba un tuklar bad bthah ïa ka Pro-VC ba kan wan shimti ïa la ka kamram ne ban kan ïehnoh kam, ban ailad ïa ki professor kiba la ih ha ka kam ba kin shimti noh kum ki Acting VC,” ula ong.