Ha u Lat ka jylla phah tuklar ka NEHUSU bad KSU halor ki kynrum kynram ka skul bah NEHU

Shillong, K’lyngkot 12: Ka North-Eastern Hill University Students’ Union (NEHUSU) bad ka Khasi Students’ Union (KSU) kila phah ban tuklar ha u Lat ka jylla u CH Viajayanshar halor ki kynrum kynram kiba mih ha ka jingpynïaid kam bad jingpynïaid ïa ka pisa tyngka ha NEHU.
Katkum ka dorkhas ïa kaba la aiti mynta ka sngi Nyngkong kine ki ar seng, kila kyntu ïa u Lat ban weng noh ïa u Vice Chancellor da kaba kdew ba ka jingpep trei kaba la kot haduh 400 spah sngi tam bad kane kala pynlong ban sahkut bad pulom lut ki kam jong ka ophis jong kane ka skul bah.
Shuh shuh ka dorkhas kala kdew, “Ngi kyrpad da kaba burom ba ïa u Prof Prabha Shankar Shukla dei ban weng noh na ka Ophis Vice Chancellor ka North Eastern Hill University”.
Kane ka jingkyrpad kine ki ar seng ka long ruh ban dawa weng kam noh mardor ïa u Vice Chancellor u Prof Prabha Shankar Shukla namar ka jingjah trei la palat 400 sngi.
Kine ki aeseng kila kyntu ia u Lat ka Jylla CH Viajayanshar ba un tuklar lem halor ki kynrum kynram kkiba mih ha ka jingpyniaid kam bad jingpyniaid ia ka pisa tyngka ha NEHU.
Shuh shuh kine ki ar Seng kila kyrpad ban thung ïa u Acting Vice-Chancellor kat kum ka NEHU Statutes, hadien ka jingïehnoh kam jong u Pro Vice-Chancellor ha ka 15 tarik Nohprah, 2025.
Nalor kane, kila pan ruh ia ka jingpynshai halor ka jinglong jingman jong ka kaiphod ka Inquiry Committee bala thung da ka Ministry of Education ha u bnai Naiwieng,2024 bad kyrpad ban leh eiei ha kaban tem ïa ka jingduna pisa kaba la ktah ïa ka skul bah bad kiwei kiwei.