Shillong, Jylliew, 14: U Symbud Myntri Rangbah ka Jylla u Bah Sniawbhalang Dhar ha ka sngi Balang u la ïathuh ba ka Regional Committee na ka bynta ka West Jaiñtia Hills District kaba la ïa kynduh ha ka sien banyngkong eh ha nongbah Shillong kan sa leit ban sorjamin ïa ki jaka ba don ha ka jingïakajia pud ha West Jaiñtia Hills District bad West Karbi Anglong District ha ka taiew ba khatduh jong bnai Jylliew lane Naitung shwa ban phah ïa ka kaiphod sorjamin sha ki Sorkar Jylla ha u bnai Nailar, 2023.
Ka Regional Committee kan sa bishar bniah ïa ki jaka ba ïakajia pud ha Block I (Psiar-Khanduli) kaba don ha khappud jong ka West Jaiñtia Hills District bad ka West Karbi Anglong District.
Ha kane ka jingïalang la ïashim bynta lang da ki Deputy Commissioner jong ka West Jaiñtia Hills District bad ka West Karbi Anglong District, ki dkhot jong ka Jaiñtia Hills Autonomous District Council bad ka Karbi Anglong Autonomous District Council bad kynthup ruh ki nongïalam shnong na ki ar tylli ki district jong ka jylla Meghalaya bad Assam.
Ha ka jingïalang ba la pynïaid da u Bah Sniawbhalang Dhar uba long ruh u Chairman jong ka Regional Committee na ka bynta ka West Jaiñtia Hills ryngkat ka jingdonlang jong u Piyush Hazarika uba long u Myntri ka tnat Information and Public Relations ka Sorkar Assam, la mynjur ba ki dkhot jong ka komiti kin sa leit sorjamin lang ryngkat bad ki Myntri Rangbah jong ka Jylla Assam bad Meghalaya.
“Ngim pat lah ban shim rai eiei halor ka jingïashim ne ka jingïaai, ïa mynta ngi dang ïakren tang ban leit sha ki shnong kiba don jingïakajia bad ban sngap ïa ka sur jong ki paidbah khnang ban pynkut noh ïa ki jingïakajia na baroh ar tylli ki jylla,” la ïathuh u Bah Dhar ha ka jingïakren bad ki lad pathai khubor.
“Shuh shuh, ka Regional Committee ka la rai ban aiti ïa ka kaiphod sorjamin sha ki Sorkar ha u bnai Nailar. Shwa kane, ngin sa leit sorjamin shwa ïa ki jaka ba don ka jingïakajia pud ha kaba kut taiew jong u bnai Jylliew lane ha kaba sdang jong u bnai Naitung, ryngkat lang bad ki Myntri Rangbah,” u la bynrap.
Ka regional committee kan sa shong biang ïa ka jingïalang ha u bnai Naitung, la ïathuh u Bah Sniawbhalang Dhar.
