Ha u Jylliew-Naitung yn sdang biang ka jingïakren pynbeit pud ba-ar : Himanta

Shillong, Ïaiong 06: U Myntri Rangbah ka Jylla Assam Himanta Biswa Sarma hynne ka sngi balang, ula pynbna ba ka bynta ba -ar jong ka jingïakren pynbeit pud hapdeng ka Assam-Meghalaya ha ki hynriew tylli ki jaka ba dang sah, kan sdang noh ha u bnai Jylliew-Naitung.
“Ngi khmih lynti ban sdang ïa ka jingïakren halor ki hynriew tylli ki jaka ïakajia ba dang sah, ba kan sdang ha u bnai Jylliew-Naitung” ong u Sarma haba ïakren bad ki nongthoh khubor.
U Himanta u pyntip ba mynta ka Survey of India kala sdang ban leit sorjamin ha ki hynriew tylli ki jaka bala dep ïapynbeit hapdeng ki artylli ki Jylla.
“Kat kum ka MoU bala iasoi, ka survey of India kan sa leit thung ïa u mawpud bad hadien kane yn sa pynskhem ïa ka soskular baroh kawei” ula ong.
Haba pynpaw ba ka bynta ba-ar jong ka jingïakren pynbeit pud kan long kaba eh bha, u Himanta ula ong “Ka bynta kaba ar kan dei kaba bun ki jyrwit jyrwat namar ki don bun ki jaka kiba jur ka jingïakam trai na baroh arliang kum ka Langpih, BlockI bad Block-II”.
Hynrei ula pynpaw pat ïa ka jingkyrmen ba ki artylli ki Jylla kin sa lah ban pynbeit shisien ka sngi ïa ka jingïakajia ha kine ki hynriew tylli ki jaka ba dang sah.
“Mynta ki Sorkar Jylla bad ki Nongshongshnong ka Assam bad Meghalaya kim shym la ïakren shuh tang ha ka bynta jong ka jingïakajia hynrei kila ïakren ruh halor ki lynti ban pynbeit noh ïa kane ka jingïakajia” ula ong haba bynrap “Nga don ka jingngeit skhem ba shisien ka sngi ngin sa lah pynkut noh ïa ka jingïakajia sa ha ki hynriew tylli ki jaka ba dang sah. Hynrei ngam pat lah pat ban batai lypa kumno bad lano ba kan kut”.
Halor ka jingdawa jong ki Liang Pyrshah ban shong bishar biang ïa ka soskular pynbeit pud, une u Myntri Rang bah ka Assam ula ong ba ki artylli ki Jylla kim dei shuh ban nang khyllie trai biang ïa kane ka kam.
“Mynta ba la dep iasoi ïa ka soskular, kala don ruh ka jingdawa na ka Liang Pyrshah ha Assam ban shong bishar biang hynrei nga la jubab ha Ïingdorbar ba khatduh hi kine ki jaka baroh ki hap hapoh India bad kum ki shipara, ngi la iasoi ïa ka soskular bad ngi la pynkut noh ïa ka jingïakajia haba phai sha ki hynriew tylli ki jaka. Namar kata ngim dei shuh ban nang khyllie trai biang” ula ong.
Haba kylli halor ka jingbym hun jong ki nongshongshnong ha khappud halor ka rai jong ki artylli ki Jylla, u Himanta ula ong “Phim lah ban shu ïoh beit tang ki jingkmen ha manla ki jingiateh soskular. Kin don beit ki briew ki bym sngewhun hynrei kaba donkam eh ka long ba ka Ri ka dei ban kmen ïa kane bad kane ka dei ka motto jong ngi”.
Halor ka jingkylli ka Liang Pyrshah ka pynkylla kam politics ïa kane ka kam, u Myntri Rangbah ka Assam ula kyntait ban kynthoh eiei ïa ki Liang Pyrshah ka Jylla Meghalaya bad ong “ Kane ka dei ka kamram jong u Myntri Rangbah ka Meghalaya ban khmih la ka dei ka jingai khublei ne ka jingshah kynthoh hynrei haba phai hi sha Assam, ngi lah dep jubab lut ïa baroh ki jingkynthoh ha Ïingdorbar bad ki paid Assam hi kila kyrshan ïa ka Sorkar”.