Ha u Jylliew lah ban tur sha Secretariat, yn bteng shet Ja biang ka kynhun ki nongshet

Nongstoiñ, Ïaiong 13: Ka kynhun ki nongshet Ja ïa ki khynnah skul ha ki skul bapher bapher kiba don ha ka thaiñ jong ka West Khasi Hills District, mynta ka sngi ki la pynlong ïa ka jingïalang ha Free Morning School Nongstoiñ, kum shi bynta ban ïathir jingmut haba ïadei bad ki jingeh kaba ki nongshet Ja ki mad man la ka por.
Ha ka jingïakren snai bha, la shim ruh ïa ka rai ban bteng biang ïa ka kam kum ki nongshet, namar ka sorkar ka la kular ban pynkiew noh ïa ka tulop kaba ki ju ïoh tang 1000 tyngka shi bnai haduh mynta mynne.
Kum ban shu pynkynmaw katei ka kynhun myn ha u bnai Lber 2022 ka la sangeh ban pyntyllun ïa la ki kam ha la ki skul ki skul kaba long ruh kum shi bynta kum ka jingïakhih. Ha ka jingïakren bad u nongthoh khubor, ki la ong ba hadien jong u bnai Jylliew 2022 lada ka sorkar kam leh ïa kaba donkam, ka seng kan bteng biang ïa ki jingïakhih da kawei pat ka lynti.
Ha katei ka jingïalang la wan lang ki longkmie nongshet Ja skul naduh na Mawshynrut, Mawthadraishan Rambrai bad na kiwei kiwei kumjuh ruh u Bah Kenneth Shadap Nongaibuit ka seng. Ïa katei ka jingïalang la pynlong da ka Cook Cum Helper Nongstoiñ hynrei la wan ban kyrshan lang da ka sengkmie jong ka seng ki nongshet Ja skul ha kaba I kong Bilin Kurbah, President, All Meghalaya Midday Meals Worker bad kiwei kiwei ki dkhot ka seng kmie ki la ïadonlang.