Ha u Dy. CM pynsngew ki san shnong ba sniew palat ka surok na Mawtawar sha Mawsiatkhnam

Shillong, Ïaïong, 20: Ki nongïalam jong ka Synjuk ki Nongsynshar Shnong jong ki san tylli ki shnong kiba kynthup ïa ka shnong Madan Mawkhar, Umrynjah, Umphrew, Nongkohlew bad Mawsiatkhnam ha ka sngi Baar ryngkat ka jingsynran lang jong u MDC ka Mawlai Constituency u Bah Teiborlang Pathaw ki la pynsngew hakhmat u Symbud Myntri Rangbah ka Jylla u Bah Prestone Tynsong uba peit ruh ïa ka tnat PWD (Roads) halor ka jingsniew shaba palat ka surok naduh Lummawsing, Mawtawar ter ter shaduh Mawsiatkhnam.
Kane ka surok ka dei kaba la shna pynbha ha ki snem kiba mynshwa na ka bynta ban pynsuk ïa ki paidbah ha ka leit ka wan bad khamtam ïa kiba thmu ban leit sha Shillong Airport kaba don ha ka shnong Umroi.
U Bah Teiborlang Pathaw ha ka jingïakren bad ki lad pathai khubor hadien ka jingïakynduh ïa u Symbud Myntri Rangbah u la ong, “hadien ka jingud jingnam jong ka Synjuk ki Nongsynshar Shnong na ki san tylli ki shnong kiba don na Mawtawar sharum halor ka jingsniew shaba palat jong ka surok naduh Lummawsing, Mawtawar shaduh Mawsiatkhnam namarba ka la ktah bha ïa ka leit ka wan, dang shen ma nga bad ki nongïalam shnong ngi la kyrpad ïa u Symbud Myntri Rangbah ban phah maramot malu mala bad ngi sngewnguh shikatdei eh namarba la shu pynbha khyndiat. Hynrei mynta kane ka surok kaba 10 kilomitar ka la sniew bha bad ka la ktah bha ïa ka leit ka wan bad nalor ba ka dei ka surok kaba pynïasoh bad ka Shillong Airport.”
Hadien ba ki nongïalam ka Synjuk ki la shong jingïalang ki la rai ban ïakynduh ïa u Symbud Myntri Rangbah na ka bynta ban shna pynbha ïa kane ka surok, u la ong.
“Sa kawei pat ka jingeh ka long ba kine ki san shnong ki dei kiba hap hapoh ka East Khasi Hills District bad lada lip ka bording sha Ribhoi District ka lip lang sha kine ki shnong. Ngi la ïakren ïa u Symbud Myntri Rangbah ba un shimkhia lem halor kane ka jingeh jong kine ki shnong,” u la ong.
Haba kylli, u la ong, “na ka liang jong u Symbud Myntri Rangbah u la kular ban sa shimkhia ban pynrung ïa kane ka surok ha Phase-III kaba 200 kilomitar bad ïa ka jingeh jong kine ki san tylli ki shnong ngi khmihlynti ba yn sa lah ba weng noh kham kloi.”
“Da ka jingshna pynbha ïa kane ka surok kan weng ruh ïa ka jingdheng kali namarba katba nang bun ki surok Bye-pass katta kan nang weng ïa ka jingeh ki paidbah namaba kane ka surok ka poi haduh ka Shillong Airport,” u la ong.
U la ïathuh ba ka Synjuk ka la pynsngew ha u Symbud Myntri Rangbah ban pyndep noh kham kloi ïa ka surok PWD naduh Mawsiatkhnam shaduh Umrynjah ïa kaba la mang lyngba ka skhim PMGSY bad ïa ka surok naduh Madan Mawkhar haduh Nongkohlew.
U President ka Synjuk u Bah B. Thangkhiew haba bynrap halor kane, u la ong, “ngi kyrmen ba kane ka jingïakynduh jong ngi ïa u Symbud Myntri Rangbah kan urlong noh shen ynda la pyntreikam ïa ka skhim PMGSY.