Nongstoiñ, Jymmang 27: Lai sngi hadien ba ki nongïalam ka FKJGP Rambrai circle ki la leit ban ïakynduh ïa u syiem ka hima Rambrai, ban pan jingshai halor ka jingpynlong jaka bret jaboh harud jong ka ïew ha syndah jong ki dukan ba ki nongdie jingdie ki shong. Kumta, ha kane ka sngi hat majai ka 27 tarik Jymmang, ki nongïalam ka seng ki la leit ban aiti da ka jingthoh bad ujor ha u bah Garod L.S.N Dykes IAS Deputy Commssioner ka West Khasi Hills Chairman jong ka Swaach Bharat Mission, ba un shimkhia lem ban tuklar halor katei ka jingjaboh jong ka ïew Rambrai.
U bah Jiedstarland Lyngkhoi president ka FKJGP Rambrai circle, haba ïakren bad u nongthoh khubor hadien ba ki la mih na ka kamra trei kam jong u Deputy Commissioner, u la ong ba ka jingleit ïakynduh ki la aiti ruh da ka jingthoh ha u ban kyrpad ba un leh ïa kaba donkam.
Utei u nongïalam ka seng u la ong ruh ban a ka liang u Deputy Commissioner, u la kular ba un shimkhia bad ka dei halor ka nongrim ba u Syiem kum u khlieh nongsynshar jong ka hima um shym la shimkhia bad pynkloi katba lah ban leh ïa kaba donkam.
Ha kajuh ka por u la ong ba ka seng kam sngew tynnad satia, ban ïohi ba ki paitbah nongshong dukan bad die jingdie sawdong katei ka jaka, kin shu shong halor ki jaboh ryngkat ka jingsma ka bym lah ban ong, namar kan ktah ïa ka jingkoit jingkhiah jong ki.
Kum ban pynkynmaw ba ha ka sngi saitjaiñ, ki nongïalam ka seng ki la leit ban ïakynduh ïa u Syiem ka hima Rambrai, ban pan jingshai halor ka jingsyrtap ki jaboh jabaiñ harud jong ki dukan ïew, ha kaba u Syiem u la pynksan pynban da kaba ong ba ym ïoh jaka.
Utei u nongïalam ka seng u la ong ruh ba ka jingbym kit khia jong u Syiem ban wanrah ïa ka khuid ka suba ha ïew Rambrai, ka pyni ba u Syiem um sngewthuh ei ei halor ka jingkordor jong ka jingleh khuid.
U la bynrap ruh da kaba ong ba katei ka ïew ka dei kaba la pynïaid da u Syiem, kumta lada u Syiem u don ka jingkitkhlieh ban wanrah ïa ka jingkhuid, kam don jingeh lada un pynsngew sha baroh ki nongsynshar shnong, ba u Syiem u kwah ban ïatreilang ban wanrah ïa ka khuid ka suba ha ki shnong ki thaw bad hapoh jong ka ïew.
U la bynrap shuh shuh da kaba ong ba u Syiem u ba dei u nongsynshar jong ka hima, lada u don ka jingkitkhlieh ban wanrah ïa ka jingkhuid hapoh ka ïew bad ki shnong ki thaw, u la dei ban kyntu ïa baroh ki nongsynshar shnong ba kin wan ban ïatreilang bad u Syiem, ban wanrah ïa ka jingkhuid jingsuba ym tang hapoh ka ïew hynrei ha baroh ki shnong ki thaw hapoh ka hima.
