Ha u DC leit pynsngew biang ka FKJGP ban ai kyrteng noh ïa ka Circuit House sha u Sngap Sing Syiem
Mawkyrwat, ‘Naitung 09 : Ka Federation of Khasi Jaintia and Garo People (FKJGP) Mawkyrwat Circle, South West Khasi Hills District, hapoh ka jingïalam jong u bah Enbor Syiem, General Secretary mynta ka sngi ka 09/07/2025 ka la leit ban pynkynmaw biang hakhmat u Deputy Commissioner ka South West Khasi Hills District ban buh kyrteng noh ïa ka ‘Circuit House’ ha ka kyrteng ba don nam kata u “Sngap Sing Syiem” uba dei u Syiem bakhraw ka Hima Maharam.
Ym tang kata, ka seng ka la buh ruh ïa ki nongrim kiba biang ba lada pynkylla ka long na ka daw ba naduh myn nyngkong hi, ha ka por ba tei ïa u mot dur jong u ‘Sngap Sing Syiem’ ha phyllaw jong ka Circuit House, ka nongrim ka long ban ai nam bad ai burom ha ka kyrteng jong une Syiem ïa kane ka Circuit House.
Shuh shuh la ong ba, ban shu pynkynmaw ba u Sngap Sing Syiem u dei u Syiem ka Hima Maharam bad u nongïaleh laitluid ka jaidbynriew ha ka por u Tirot Sing Syiem. U Sngap Sing Syiem u long u Syiem uba la wanrah nam bad burom ïa ka Hima Maharam bad ïa ka jaidbynriew. Kumta, la sngew dei eh ban ai nam ïa une u Syiem bad ban da thoh noh da ka kyrteng jong u ha ka jaka jong ka jingthoh ‘Circuit House’ kaba don mynta, kum ka dak ban burom ïa ki mat-ti kiba une u ‘riew khraw u la leh ha ki por ba la leit.
Haba kren ki lad pathai khubor, u Enbor Syiem, General Secretary ka Federation of Khasi Jaintia and Garo People (FKJGP) Mawkyrwat Circle, South West Khasi Hills District u la ong ba kane ka jingleit ban ïa kynduh ïa u bah B. Mawlong, IAS, Deputy Commissioner jong ka South West Khasi Hills District ka long ban pynkynmaw ïa kaei ba ki la don ïa ka jingpynsngew ha ki snem kiba la leit noh. Ym tang kata, u la ong ruh ba da ka jingbuh noh da ka kyrteng jong u ‘Sngap Sing Syiem’ hapoh ka Circuit House ha Laitlawsang ka long ka jingpynsah nam ïa ki kam ba u u la leh na ka bynta ka Hima Maharam baroh kawei.
Namarkata, u la ong ba halor kitei ki nongrim kiba ba kum ka seng ka don, ka da kyrpad ïa u Deputy Commissioner ka South West Khasi Hills District ba bun shimkhia lem ïa kane ka kam la ka dei ha ki jingpynbna paidbah ne ha ki jingthoh.
Shuh shuh halor kane ka jingleit pynsngew jong ka Federation of Khasi Jaintia and Garo People (FKJGP) Mawkyrwat Circle, na ka liang u Deputy Commissioner ruh u la kular ban sa leh ïa kaba donkam.