Ha u CM pynsngew ki nongñiah trok ïa ki jingeh naba sahkut ha shiteng lynti

Jowai, Jylliew 19: Ki nongñiah trok kiba la sahkut da ki bun bun sngi mynta na ka daw ka jingtwa jong ka surok hajan Toll Gate ha Lumshnong East Jaiñtia Hills District, kila la ïoh lad ban ïakynduh markhmat bad u Myntri Rangbah mynta ka sngi ha ka por ba u dang wan jurip ïa ka jinglong jingman jong katei ka surok.
Kitei ki nongñiah kali ki la ïoh lad ban pynsngew ïa ki jingeh jong ki naduh ka 16 tarik tad haduh mynta ka sngi ki dang sahkut hajuh ka jaka, shuh shuh kila pynsngew wat ki jingbam jong ki ruh kila jan lut bad kane kala buh jingeh ban pyndap lada dang slem ban pynlait ïa katei ka surok.
Hadien kitei ki nongñiah trok kila ïoh ban pynsngew ïa ki jingeh, na ka liang u Myntri Rangbah u Conrad K Sangma ula kular ban ïaleh katba lah ban phah pyllait noh ïa katei ka surok hapoh 72 kynta lada sangeh noh ka jinghap u slap.
Ha ka juk ka por ula kyntu ïa ki nongñiah trok ba kin long kiba ïaishah shipor sa tang katto katne kynta yn sa lah ban pyllait noh ïa ka surok khnang ba kitei ki kali ba sahkut kin ïoh ban ïaid noh sha ki jaka ba ki dei ban poi, u la ong ruh ba kam dei ka kam kaba suk ban leh mardor namar ka kam ka long kaba eh bha.
Kumba long une u Surok NH-6 u lah ban pynïasoh ïa kiba bun ki jylla jong ka thaiñ shatei lam mihngi kiba dei ban ïaid lyngti lyngba jong une u surok.