Shillong, Rymphang 10: Ka Jiont Action Committee (JAC), kaba kynthup ïa ka East Jaintia Hills Truck Owner & Transportation Association bad ka Jaintia Hills Truck Owner Aoosiciation, mynta ka sngi kila leit ban kynduh ïa u symbud myntri rangbah u Bah Sniawbhalang Dhar uba peit ïa ka tnad Transport bad aiti ruh da ka dorkhas.
Ka dorkhas kaba la soi da u Bah Kyrshan Dkhar uba dei u President ka East Juinia Hills Truck Owne &Transporter Association bad u Bah Biangshwa Shylla uba dei u President ka Jaintia Hills Truck Owners Association kila pynpaw ba bun ki trai kali kamai, khamtam eh kito kiba na ki longïing kiba duna ha ka liang ka ioh ka kot, ki bym lah ban pynneh pynsah ïa ki kot ki sla jong ki kali (kum ki Permit, ki kot pynshisha ïa ka jingkoit jingkhiah, ki khajna, bad kiwei kiwei) la katto katne snem namar ka jingduna pisa.
Katkum ka dorkhas kaba la aiti sha u Bah Sniawbhalang, ka JAC kala kyrpad ban pyntrei kam noh ïa ka Special One Time Settlement (SOTS) Scheme na ka bynta ban pynbeit ryntih ïa ki kali kiba don ki kot ki sla kiba la sahteng slem, bad kane ka scheme kan pynduna ïa ki bai lutksan na ka jingslem bad siew bad kumjuh ruh ka jingshah dain kuna.
Ka rukom treikam kaba lah ban ïoh na ka bynta ki dkhot ban siew ïa ka khajna ba sahteng, bad ka jingïa sngewthuh jingmutlang ha kaba ïadei bad ki jingmyntoi, lada pyntrei kam ïa kane ka scheme.Ngi ngeit ba ka jingpyntrei kam ïa kane ka Special Settlement Scheme kan ai ïa ka jingmyntoi ym tang ïa ka sorkar hynrei kan ruh ïa ka JAC bad ïa baroh ki dkhot jong ka
Na ka bynta ka Sorkar, Kan pynmih mardor ïa ka khajna kaba heh na ka jingpynkhuid ïa ki jingsiew khajna kiba la rim, kiba la khang bad kan wanrah biang ïa ka jingbun jong ki kali kiba dang treikam mynta ne ki bym kohnguh ïa ki kyndon aiñ, kaba pynthikna ïa ka lad kaba skhem, kaba lah ban shaniah jong ka khajna kaba ju wan biang man la u snem na ka bynta ka jingïohnong kaba ju wan biang man la u snem.
Na ka bynta ki trai trok, Kan ai bor ïa ki dkhot, kiba mynta kim lah ban siew ia ka jingsiew ba heh, ban sdang biang ïa ki kam katkum ka ain, bad ban pynneh pynsah ïa ki kot ki sla jong ki kali
Ngi shaniah ba phin peit lem ha kaba ïadei bad kane ka mat da ka jingsngewrit bad jingpyrkhat ba shisha na ka bynta jingbha ki dkhot ka JAC bad kumjuh ruh ïa ka tnad Transport jong ka jylla.
