Shillong, Nailur 28 : Ka sorkar jylla ka buh thong ba la kumno kumno ha u snem 2028 kan kot 100 persen ka Literacy Rate ne ka jingdon ki nongshong shnong kiba la nang la stad ne kiba la nang ban thoh ban pule.
Kumba phi tip ka Literacy Rate ba ngi don mynta kam pat long satia kaba hun haduh katta katta namar tang 91, 92 persen. Ka thong jongngi ka long ba shwa u 2028 ngi dei ban poi sha ka thong ba kynjoh 100 persen ka Literacy Rate,” ong u Symbud Myntri Rangbah ka Jylla, Bah Prestone Tynsong haba kren kum u Kongsan ha ka jingïalang pynkup burom ïa ki 444 ngut ki samla ba pass bha na ka Shillong South Constituency kaba la pynlong da u MLA ka thain Bah Sanbor Shullai uba dei ruh u Myntri sorkar ka jylla.
Da kaba ai jingïaroh ïa u MLA uba la lah ban pynlong ïa kat katei ka jingpynkup burom kaba shongkun, na ka liang u Bah Prestone u la ong ruh ba lada ha baroh 60 tylli ki constituency ki don haduh 444 ngut kiba pass bha khlem artatien ka Literacy Rate kan long 100 persen.
Ha kajuh ka por u Kongsan u la kyntu ruh ïa ki kmie ki kpa kumjuh ki nonghikai ba kin shim ïa ka jingkitkhlieh khnang ba ki khun samla jong kane ka juk kin lait na shibun ki jingpynshoi bad ba kin long ruh ki nongkit lang ïa ka lyngkor jong ka sorkar jylla ha ki snem ban wan.
Lah ban kdew hangne, ba ha ka jingïalang pynkup burom ba pynlong da ka Raid Laban Sports Social and Cultural Organisation ha kane ka sngi Saitjain ki la don haduh 444 ngut ki samla pule kiba shah pynkup burom. Na kine haduh 77 ngut ki la ïoh pdiang da ki laptop namar ka jinglah jongki ban pass bha ha ki eksam bapher bapher kynthup ïa ki samla kiba wan na ki longiing kiba duk hynrei kiba lah pat ban leh bha ha ka eksam.
Nalor kine, ka RLSSCO ka la sam ruh haduh 20 tylli ki table sha kito ki khynnah kiba la jied kyrpang.
Katkum ka jingïathuh jong u Bah Sanbor, kane kadei ka snem kaba 22 ba kum ka kynhun ki la lah ban bteng ïa ka jingpynkup burom na ka bynta ki samla pule na ka constituency kiba leh bha ha ki jingpule jong ki.
