Shillong, Kyllalyngkot 15 : U Myntri Rangbah ka Jylla u Conrad K Sangma ha ka sngi Palei, ula pyntip ba ka project shna pynheh ïa ka Kad Liengsuin Shillong kaba ha Umroi ka la ïaid shakhmat mynta wat hapdeng ka jingïakynduh ïa ki katto katne ki jyrwit jyrwat.
“Ki kam ki jam kila ïaid ha ka lynti kaba dei…ka dei ka kam kaba kyllaiñ bha kaba donkam ïa ka jingtuklar ha ki kyrdan bapher bapher bad ki kynhun bapher bapher kiba don bynta ha ka kam” ula ong.
U Conrad ula kren halor ka kam jaka bala pynsngew dang shen da ka Directorate General of Civil Aviation (DGCA), ba ïadei bad ki jingsngewkhia halor ki jingshngaiñ, ïa kiba ka Sorkar kala shimkhia ban pynbeit.
“Sa kawei ka kam jaka kala mih biang, kaba ngi la pyrshang ban pynbeit mynta….ka jingshngaiñ jong ki liengsuiñ bad ka jingshngaiñ jong ki briew ba sah ha ka thaiñ, ka dei ka bynta ba hakhmat eh jong ngi” ula ong.
U Myntri Rangbah ula pynpaw ïa ka jingsngew skhem ba kane ka project kan nym slem palat, haba khmih lynti ba ki jingpyntrei ïa ki kam kin sa sdang noh shen.
“Ngim khmih lynti ban don ka jingslem haduh katta katta ha ka kam…shisien bala dep kane ka bynta, ka jingpyntrei ïa ki jingtei kan sa sdang bad katba ki jingtei ki dang ïaid, ngin dang wad ïa ki lad ki lynti ban pynbeit ïa kiwei pat ki jingeh ba sahteng” ong u Conrad.
U Conrad ula pynbna ba ka Sorkar ka thmu ban pyndep ïa kane ka project hapoh u 2027, da ka jingkhmih lynti ba ki liengsuiñ kiba heh kin sdang ban her bad hiar na kane bad ha kane Kad Liengsuiñ naduh u bnai Rymphang-Lber 2027.
