Shillong, Naitung, 14: U MLA barim ka Mawkynrew Constituency (Dienglieng ha kato ka por), Bah Martle N Mukhim u la ong ba ka jingjop ïa ka elekshon MDC ha u 2019 ka la ai mynsiem ïa u bad ruh ïa ki nongkyrshan ban ïaid shakhmat ban pynkhreh pat na ka bynta ka elekshon MLA kaban long ha u 2023.
“Ha ka elekshon MLA ha u 2018 ngi shah rem tang khyndiat eh, hynrei ka jingjop pat ha u 2019 ka la ai mynsiem ïa ki nongkyrshan ba ngan aireng biang ha kane ka elekshon MLA ha u 2023,” ong u Bah Martle haba kren bad ki lad pathai khubor.
Utei u nongmihkhmat uba la bat teng ruh ïa ka shuki Myntri ha ka sorkar jylla u la ong ruh ba watla um dei u briew uba don ka spah ka phew pynban ka mynsiem shakri bad ka jingtreikam da ka jingieid ka pynlong ïa ki paidbah ban ïai bteng ban kyrshan ïa u.
“Hadien ba nga rem ïa ka 2018, ki paidbah ki la ong lypa ba donkam ban ïakhun ïa ka elekshon MDC ha u 2019 khnang ba ki nongkyrshan kin ym saphret. La ïa kren lypa ruh ba lada jop ne rem dei ban ïakhun beit ha u 2023, kumta ka jingjop ha u 2019 k ala dei u mawkyndon na bynta ka elekshon 2023,” la ïathuh shuh shuh utei u rangbah ba bat ruh kum u Executive Member ka KHADC.
Nalorkata, u la ïathuh ruh ba ha ka por ba u jop biang ha ka elekshon 2019 kiba bun ki la lyngoh lut. “Kadei ka jingpynïaid ba stad jong u Kynrad ba ngi ïoh ïa ka jingjop kaba don burom,” u la ong da kaba ïathuh ba ha katei ka elekshon MDC ki ïoh ruh ïa ka jingkyrshan kaba radbah na ki nongkyrshan ka NPP kumjuh ruh na ka Congress.
