Nongpoh, Risaw 27: Ka Meghalaya Weightlifting Association kaba dei ka kynhun rah nar jong ka jylla, ha kane ka kynti ba mynta kala rai ban phaikhmat sha South West Khasi Hills District kaba dei ruh ka District kaba dang thymmai ban pynlong ïaka lympung ïakop rah nar kaba la tip kum ka 4th State Weightlifting Championship.
Naka liang u Bah Donald Rymbai President ka MWA haka jingdonlang u Bah Batskhem Basaïawmoit Secretary lem bad ki dkhot, u la pyntip ba ïa katei ka lympung yn sdang naduh ka 08 tarik Naiweing, 2025, ha Mawkyrwat hadien ba la pynlong ïa ka ha Jowai ha u snem ba ladep.
U la ong ruh ba kane ka jingïakop yn kynriah na kawei ka District sha kawei pat ban sei ïaka sap ka phong ki khun samla kumba kane ka jait jinglehkai ka dei ruh kaba la ithuh da ka Olympics, bad ha kane ka kynti ka South West Khasi Hills Weightlifting Association kaba dei ka kynhun ba dang thymmai kan sa shim ïaka sienjam ban pynïaid ïa kane ka lympung.
Kum ka kynhun ka MWA ka khot ka wer ïaki khun samla kiba donsap bad kiba sngewtynnad ha kane ka kam rah nar ba kin wan ban shim bynta ha kane ka lympung, namar kiba rang bad ki thei ïalehkai kiba jop na kane ka lympung kin ioh pat ban shim bynta shaka National Games ka ban sa long ha u snem ban wan bad kiwei kiwei ki lympung ba heh haka ri.
Ha kane ka jingïakop rah nar ki don ar bynta ba kynthup ïaka Snatch bad Clean & Jerk ha kaba yn phiah ha ki 3 kyrdan ba kynthup naka bynta ki khynnah ba dang 13-17 snem kynthei bad shynrang, ki samla 15-20 snem bad ki senior.
