Ha sor ki briew ki sngewtynnat ban thang mombati haba bamja miet, kren pharshi Bah Lahkmen

Shillong, Nailur, 10: U MLA jong ka UDP na Amlarem u Bah Lahkmen Rymbui ha ka sngi Balang u la kren pharshi da kaba ong, katba ki briew ha ki jaka sor ki sngewtynnad ban bamja miet da kaba thang mombati hynrei ki nongshong shnong ha ka Constituency jong u ki hap ban bamja miet da kaba thang mombati manla ka sngi namarba ka jinglip bording khah khah.
Haba pynpaw ïa ka jingsngewkhia hapoh ka Ïingdorbar, u Bah Rymbui u la ong ba watla ki don ar tylli ki projek pynmih bording kata ka Lakroh bad ka Myntdu-Leshka hynrei ka thaiñ ka dang mad ïa ka jingduna bording kaba jur bha. U la kyntu ïa ki bor ba dei peit ban shim ïa ki lad ki lynti ban pynduna ïa ka jingpynlip bording bad u la kyrmen ruh ba ka jingtrei shitom kan weng ïa ka jingkyrduh bording.
Ha ka jubab u Myntri ka tnat Bording u Abu Taher Mondal u la pynthikna ba ka tnat ka la shim ïa ki sienjam ban pynduna ïa ka jingpynlip bording ha katei ka thaiñ.
Halor ka daw ka jingpynlip bording kaba ju jia manla ka por, u la pynpaw ïa ka jingsngewsih ba kiba bun ki jaka kiba hap hapoh ka Amlarem Civil Sub-division bad ki thaiñ Bakur-Dawki-Darrang ki la mad ïa ka jinghap slap kaba jur, ka jingthied pyrthat kaba wanrah ïa ka jingsniew jong ki Conductor bad ka jinghap ki dieng ha ki laiñ bording namarba bun na ki sainar ki ïaid lyngba ki bri rep bad kiwei kiwei.
U Myntri u la kdew ruh ïa ka jingpynlip bording ka long ban maramot ïa ki laiñ kiba thud bad kiba sniew khnang ban pynjanai ïa ka jingsam bording hapoh ka RDSS bad ka LR.
U Myntri u la pyntip ba ka tnad ka dang ïaleh shitom ban pynbha ïa ki jingtei, kynthup ïa ka Syndai Sub-station, ïa kaba shen yn sa ai jingmynjur ban weng ïa ka jingduna bording.
U la pynthikna ruh ba ka jingeh kaba ka Rajabala Constituency ka la ïakynduh yn sa weng noh hapoh shisnem bad u dang ïakren ban pyntreikam noh ïa ka Sub-station ha katei ka thaiñ.
U Myntri u la pyntip ruh ba ki don 16 ngut ki linemen/Jugali ha Amlarem Civil Sub-division ban pynjanai bad ban pynbiang ïa ka bording ha ka thaiñ Amlarem.