Ha skul RKM Sohra pynkut ka Myntri Pla Tyngka ïa ka jingwan jngoh ba saw sngi ïa ka Meghalaya

Shillong, Naitung 13 : Ka Myntri ka tnad Platyngka jong ka Sorkar Pdeng, ka Nirmala Sitharaman ka la pynkut ïa ka jingwan ba saw sngi jong ka sha Meghalaya da kaba leit jngoh ïa ka skul Rama Krishna Mission, Sohra ha kane ka sngi U Blei.
Ha kane ka jing, ki bor ba dei peit ki la pyni ruh ïa ka ïa ki kam jong ka Mission bad pyntip ba ki don kumba 100 ngut ki kynthei kiba ïoh jinghikai ban thain jain khlem da donkam siew ei ei.
U Swami Anuragananda, Secretary ka Ramakrishna Mission Sohra u la ïathuh ba ka Myntri ka la tip bha shaphang ki kam jong katei ka jaka pule. “Namar ba ka dei kawei na ki jaka pdeng kaba la rim tam ha ka thaiñ Shatei Lammihngi, ka la thrang ban tip shaphang ka histori, ka jingroi, bad ki jingeh ba mynta jong ka Mishon, bad kumjuh ruh ïa ki kam bapher bapher kiba ka pynïaid,” u la ong.
Shuh shuh u ong ba ka Myntri ka la pynpaw ïa ka jingsngewtynnad kaba khraw ban ïakynduh ïa ki longkmie ba seng kam lajong bad ka la pynpaw ba ka da sngewhun ban ïohi ïa ka rukom treikam ban kyntiew bad pynkupbor shuh ïa ki lyngba ki jinghikai na ka jaka jong ki.
Nangta, u ong ruh ba ki la ïathuh ruh ha ka ïa kiba bun ki kam kiba kum ka Mission ka leh la ka long ha ka koit ka khiah, ka puthi, ka imlang sahlang bad kiwei kiwei ki kam ba bha.
Shuh shuh u la ïathuh ruh ba ka Myntri ka la kylli ruh shaphang ki khynnah skul barim kiba pawnam kiba mih na kaei ka jaka pule. Kumta na ka liang u Swami Anuragananda u la ïathuh ba katto katne na ki, ki kynthup naduh u Bah B.B. Lyngdoh, Myntri Rangbah barim ka Jylla Meghalaya bad u nongprat lynti ïa ka saiñ hima sima synrop lang ha India, nangta u u Bah GG Swell MP ba pawnam ba mih na ka Jylla bd kumjuh u Myntri Rangbah barim ka jylla, u Dr. Donkupar Roy, nalor ki heh sorkar, kiba la ïoh ïa ka jinghikai na ka Mishon.
Kum ka dak ka jingpdiang burom ïa ka Myntri, la donlang ha kane ka sngi bun bha ki riewpawkhmat ka jylla kynthup naduh ka President jong ka skul, Kong Theilin Phanbuh, kaba la ïoh ïa ka khusnam Padma Shri ha u snem 2006 na ka bynta ki kam jong ka ban kyntiew ïa ki kynthei.
Lah ban kdew ba dang shen ka Ramakrishna Mission School, Sohra, ka la pyndep ïa ka jingshakri kaba 100 snem ha kane ka thain. Ka Sitharaman ka la shim bynta ruh ha ka jingthung dieng ha kane ka jaka pule ha kaba kut jong kane ka jingwan jngoh jong ka.
La ïadon lang ruh ha kane ka sngi naduh ki nonghikai bad ki nongtrei barim, kynthup ïa ka Kong Lolin Lyndem 90 snem ka rta, kaba dei ka khynnah skul barim tam ha kane ka skul kaba la shakri ruh kum ka nonghikai ha katei ka skul.
Kiwei pat kiba donlang ki kynthup naduh ki khynnah skul, ki nonghikai bad ki riewpawkhmat.