Shillong, Nohprah 14: Kan dei ha ka sien kaba nyngkong eh ba ki katto katne ki shnong jong ka nongbah Shillong kin mad ïa ka jingbym ïoh ïa ka umbam umdih napoh ka tnat Public Health Engineering kaba la pynduh um na ka daw jong ka maramot ïa ki katto katne ki bynta jong ki tiar kiba la sniew kaba la sdang nduh ka 10 tarik mynta u bnai bad kaba la buh por ruh ban pyndep ïa ka jingmaramot haduh 4 sngi.
Kane ka jingbuh por jong ka tnat PHE ka la ïaid artat mynta la jan 5 sngi lynter hynrei ki nongshong shnong ki dang hap mad ïa kane ka jingeh jong ka jingbym pat sam um jong kane ka tnat.
Lah ban ong ban pynduh um haduh palat 4 sngi kam dei shuh ka kam kaba suk ïa ki longïing kiba tlot ha ka ïoh ka kot bad ki bym kot bor ban thied ïa ka um na ki kali kit um bad kan long ruh kaba eh shisha wat ïa kito kiba la pynlang lypa ïa ka um ba kan dang neh haduh 4 sngi tam.
Kumba la ïohi ha ki jingpynbna ba na ka liang ka tnat ka la kyrpad ïa ki nongshong shnong ban long kiba ïaishah ha kine ki sngi jong ka jingbym lah ban sam um sha ki katto katne tylli ki shnong kiba don ha Sor Shillong, hynrei haduh katno pat kan suk ban long kiba ïaishah haba ki sngi ba ka la buh ki la tam.
Hynrei kumba long mynta kiba bun na ki nongshong shnong ki la pynpaw ïa ka jingsngewkhia bad ka jingud jingnam halor kane ka jingbym pat lah jong ka tnat PHE ban sam noh ïa ka um.
Lah ban pynkynmaw ruh ba ha kine ki sngi ba la leit kiba bun na ki Dorbar Shnong ki la pynlong ïa ki jingpynkhuid shnong da ka jingtyrkhong khlem da la ïoh satia ban pyndonkam pahuh ïa ka um.
Kumta halor kane kiba bun na ki nongshong shnong ki la kyntu bad kyrpad ïa ka tnat PHE ba kan pynsted katba lah ban pyndep noh kloi ïa ki jingmaramot ïa ki kor ki bor jong ka tnat kiba la sniew khnang ba kan ym wanrah shuh ka jingeh ha kaba ïadei bad ka jingdonkam ïa ka um kaba dei ban ïoh manla ka sngi.
