Ha Shilong ïakynduh ki doktor ba tbit ha ka gastroenterology bad endoscopy na kylleng ka India

Shillong, Rymphang 21: Ka Society of Gastrointestinal Endoscopy of India (SGEI), Northeast Chapter, ka la pynlong ïa ka jingïalang Annual Conference Banyngkong – ka SGEI 2026 (Northeast Chapter) ha Windermere Resorts, kaba la ïalumlang ïa ki doktor na kylleng ka ri India, kiba tbit ha ka laiñ gastroenterology bad endoscopy.
La pynlong ïa kane ka jingïalang hapoh ka jingpynïaid jong i Dr. Rangksan Singh Thangkhiew (President), Dr. Amitava Goswami (Vice President), Dr. Arup Choudhary (General Secretary), Dr. Bhaskar J. Baruah bad Dr. Hitesh Kalita (ki Joint Secretary), bad i Dr. Roshan Agarwala (Treasurer).
Ha kane ka prokram, la don 18 ngut ki nongkren kiba paw kiba na ki medical college, ki seng bad ki hospital kiba pawnam ha kylleng ka ri. Ki phang ba kongsan ha katei ka jingïalang, ki kynthup kum ïa ka jingkiew ha ka Zoom Endoscopy, ka Artificial Intelligence ha ka Endoscopy, ka Endoscopic Ultrasound (EUS), ka jingsumar ïa ka thliew ha ka kpoh ne ka sner (GI perforations), ka jingmih snam ha ka kpoh ne ka sner (non-variceal GI bleed), ka jingpang bampong ha u lamjew (pancreatic malignancy), kumno ban sumar ïa ka jingpang GERD, ki jingeh ban shim rai ha kaba ïadei bad ka Hepatitis B, bad shaphang kiwei de ki rukom sumar kiba kham shitom kum ka Per-Oral Endoscopic Myotomy (POEM) bad ka Endoscopic Submucosal Dissection (ESD). Shuh shuh, la don ruh ka jingïasyllok halor ka “Obstructive Jaundice” kaba dei shaphang ka jingpang stem, bad ruh shaphang kiwei de ki jingeh ba ki doktor ki ïakynduh ha kaba ïadei bad ki nongpang, bad kane ka pynlong ïa ka jingïalang ym tang kaba shu ïoh ïa ki jingtip bathymmai hynrei kaba ïarap bad kaba myntoi ruh ïa ki.
Kumba 60 ngut ki dkhot ki la shim bynta ha ki presentation, bad kumba 200 ngut ki delegate ki la shong ha katei ka jingïalang, kaba pynpaw ïa ka jingkiew stet bad ka jingïar jong ka tnad gastroenterology ha ka thaiñ Northeast. Ha kaba ïadei bad katei ka jingïalang, i Dr. Rangksan Singh Thangkhiew, iba dei i President bad i therapeutic endoscopist banyngkong ha Northeast India, i la ong, “Ka thaiñ Northeast ka don bha ïa ka lad ban kiew ha ka tnad gastroenterology bad ka therapeutic endoscopy. Lyngba kane ka jingïalang, ngi la lah ban pynduna ïa ka jingïapher ha ka jingtip hapdeng kiba ha ka thaiñ jong ngi bad kiwei ki jaka, ban khot ruh ïa ki doktor kiba tbit na kylleng ka ri, bad ban ïarap ïa ki doktor shane ban tip shaphang ki rukom sumar kiba thymmai bad kiba kham pynduna jingpang ha kaba ïadei bad ki jingpang kpoh. Kane ka dei tang ka jingsdang jong kum kine ki jingai jinghikai ha Northeast.”
Shuh shuh, i la ong ruh, “Ka thong jong ngi ka long ban pynthikna ba ki nongpang ha Northeast ki ïoh ïa ka jingsumar kaba biang tam ha kaba ïadei bad ka endoscopy, khlem da donkam ban leit phah sumar shabar Northeast. Ki jingïalang kum ka SGEI 2026 ki long kiba kongsan bha ban poi sha katei ka thong.” La pynïaid ïa ka SGEI – Northeast Chapter da ka jingkyrshan jong ka Gastro & Liver Foundation of Meghalaya bad ka Supercare Hospital, Shillong. Ka jingïaid beit jong kane ka jingïalang ka long ka jingsdang jong ka jingjop na ka bynta ka Northeast Chapter, bad ka pynskhem ïa ka thong jong ka ban pynkiew ïa ka jingtip bad ban pynbha ïa ka rukom sumar ha kaba ïadei bad ka gastrointestinal endoscopy ha ka thaiñ Northeast.