Ha Shillong yn ialehkai ki thei ka India pyrshah ïa ka Iran bad Indonesia ha ka Women’s Tri- Nation Friendly

Shillong, Nailar 30: Ka Jylla Meghalaya kaba paw kylleng kum kawei na ki jylla kaba ieid bha ia ka jingialehkai phutbol, shen kan sa ioh ban sakhi pat ia ka jingialehkai barri ha kaba kiwei ki ri jong ka dewbah Asia kin wan ban ialehkai ha nongbah Shillong.
Haba pynpaw ïa kane ha ka jingïalang pynkup burom ïa ki samla ïalehkai jong ka Lummawbah Sports and Cultural Club, u President ka Meghalaya Football Association Bah Hamlet Dohling u la ïathuh ba da ka jingkyrshan jong ka Sorkar Jylla na ka liang ka MFA mynta ka pynkhreh ban pynlong ïa ka Indian Women’s Tri- Nation Friendly kaba la pynbeit ban long ha u Risaw mynta u snem.
Kine ki lai tylli ki ri kin kynthup ïa ka Iran, Indonesia bad ruh ka India kaba dei ka kynhun trai jaka.
U Bah Hamlet u la ong ruh ba kane ka jingïalehkai paralok jong ki thei ïalehkai phutbol ka India kan long kaba kongsan khamtam haba ka kynhun ïalehkai ka Ri ka la ïoh ban rung sha ka AFC Women’s Asia Cup kaban long ha Australia ha u snem 2026.
Lah ban kdew hangne ba ka Meghalaya da ka jingtrei borbah jong ka Meghalaya Football Association ka la lah ban pynlong bun bha ki prokram ïalehkai kiba heh ha ka jylla la ka long naduh ka jingïalehkai hapdeng ka India bad ka Maldives nangta pyrshah ruh ïa ka Bangladesh.
Ym tang katta ka la ïoh ruh ban khring ïa ka lympung ba pawnam ha ka ri ka Indian Super League bad khamtam eh ïa ka Durand Cup.