Shillong, Ïaïong, 3: Ïa ka dur jong u Syiem Tirot Sing ba la dro da u Bah Raphael Warjri la buh sah kynmaw ha ka ingbuh sah kynmaw ïa ki nongïaleh laitluid jong ka ri India ha Salar Jung Museum, kaba don ha Hyderabad kum shi bynta ka jingrakhe jong ka ri India ïa ka jingdap 75 ka jingïoh laitluid.
Ïa ki lai tylli ki dur jong ki nongïaleh laitluid ka Jylla Meghalaya ba la plie pyrda da u Lat barim ka jylla u Tathagata Roy bad ba la pyllait paidbah ha ka 15 tarik, Nailar, 2020 Raj Bhavan la pyllait paidbah da u Myntri Rangbah ka Jylla u Conrad K. Sangma ïa ka dur jong u Pa Togan Nengminza Sangma, ïa ka dur jong u Woh Kiang Nangbah la pyllait paidbah da u Ma Sniawbhalang Dhar bad ïa ka dur jong u Syiem Tirot Sing la pyllait paidbah da u Lamphang ka Ingdorbar Thawaiñ u Bah Metbah Lyngdoh ha kaba la sakhi lang da ki Myntri Sorkar, u Chief Secretary barim u M. S Rao bad ki nongbishar jong ka Ingbishar Meghalaya High Court kiba kynthup ïa u Bah H.S Thangkhiew bad u Bah Wanlura Diengdoh.
Napdeng ki saw ngut ki nongdro jong ka thaiñ Shatei Lammihngi ba la jied da ka NEZCC, u Bah Raphael Warjri u la mihkhmat ïa ka jylla Meghalaya na ka bynta ka Art Camp kaba long kum shi bynta jong ka National Cultural Festival ha Hyderabad ïa kaba la ai kyrtreng Rashtriya Sanskriti Mahotsav.
Ïa u Bah Warjri uba dei dkhot jong ka INTACH-Meghalaya Chapter, la synran lang da ka Anuradha Reddy kaba dei ka convenor jong ka INTACH-Hyderabad.
