Shillong, Jylliew 20 : U Myntri ka tnad Animal Husbandary & Veterinary, Bah AL Hek u la ong ba ka jingtest formalin ïa ki dohkha kadei ban long ha ka jaka ba don ka cold storage bad ruh ka jaka pynieng kali kaba biang.
Kane ka jingkren u Myntri kadei hadien ka jingkynduh bad ki nongïalam jong ka Khasi Jaiñtia Fish Wholesaler and Retailer Association (KJFWRA) kiba la wan ban kyrpad ïa u ban buh noh da ka testing centre ha Khlieh Iewduh ban test formalin ïa ki dohkha kiba wanrah na shabar jylla.
“Ka jaka ba test ïa ki dohkha kadei ban long ha ka jaka kaba don bad ka cold storage bad ruh ka jaka ieng kali kaba biang,” ong u Myntri. U ong ruh ba lada ïa ka Khlieh Iewduh kan ym ïahap satia namar hangtei kam don satia ka cold storage.
Shuh shuh u la ïathuh ruh ba u la dep ban tyrwa ha ki nongïalam jong ka Association ba ha Saiden ka don ka jaka kaba biang kaba ki lah ban buh ïa ka testing centre. “Mynta ka shong sa ha ka Association kumno kin rai halor katei ka jingtyrwa.”
Shwa kane, u President ka Association, Bah Mitchel Wankhar u la ong ba kin hap ban syllok shwa bad ki para nongkhaïi ban shim rai halor katei ka jingtyrwa ban buh ïa ka testing centre ha Saiden.
“Kam long kaba suk ban pynhiar arsien ïa ka dohkha ha shiteng lynti nalor ba tang ha lynti la shimpor lypa bunsngi,” ong u Bah Mitchel haba kren bad ki lad pathai khubor hadien ka jingkynduh ïa u Myntri. Na ka liang jong u, u pynpaw ruh ba ki kwah ba ka jaka test formalin kadei ban long beit ha Khlieh Iewduh namar kadei ka jaka pdeng kaba ki kali kit dohkha nabar jylla ki poi lut.
