Ha ryngkat ki jingmana, yn pyntreikam ka DS Mynkre ha EJHD ïa ki kyndon ba pyrkhing

Khliehriat, Nailur 18 : Kum shibynta ban tehlakam ïa ki kam sniew bad kumjuh ruh ban pynneh pynsah ïa ka shongsuk, shong shngaiñ hapoh shnong, ka Dorbar Shnong Mynkre East Jaiñtia Hills District ka pynbna bad pyntip paidbah ba kan pyntreikan noh mardor ïa ki riti synshar shnong kumba la pynkup bor da ka Jaiñtia Hills Autonomous District Council bad yn pyntreikam pyrkhing ruh ïa ki aiñ shnong.
Na ka bynta kito kiba die kyiad beaiñ ha shnong, ka Dorbar Shnong ka ai por shi bnai kata naduh ka 19 tarik u nailur hasuh 19 tarik u risaw ba ki dei ban sangeh noh ïa ka jingdie kyiad beaiñ jong ki bad ba kin leh noh da kiwei kiwei pat ki kam ki bym dei kiba beaiñ.
Ha kajuh ka por ka Dorbar Shnong ka bthah ïa kito ki trai ïing kiba ai iing wai ba ki dei ban wan ban regiser ïa ki kyrteng jong ki nongshnongwai, la ki dei kiba shong wai ïing ne shong wai dukan ruh khnang ba ka shnong kan tip ïa ki briew kiba don hapoh unpud u sam jong ka shnong bad kane ka kyndon ka long ruh katkum ka jingbthah ka JHADC kaba la bthah “Ban buh jingthoh (recordd) ha ka bui (register) ïa ki ïing ki sem bad ïa ki kyrteng jong ki nong shong shnongbaroh kiba don hapoh shnong bad ruh ïa kino kino kiba wan na bar shnong ne ki ba na bar jylla kiba wan sah bad wan trei hapoh shnong”
Ka Dorbar Shnong Mynkre, lyngba u kyrwoh ba la phah da u Waheh shnong u bah Sunny Bareh bad u Secretly shnong, u bah Ferlando Lamin, kan ïaleh tyngeh ban rat diengkhong ïa ki kam sniew hapoh shnong da kaba yn pynduh pyndam noh ïa baroh ki dukan die kyiad kiba die beaiñ hapoh shnong bad la ong ruh ba ki nongshong shnong ki ïai long peitngor ha kaban teh lakam ïa ka jingwan poi u drok bad ki nongdih drok, ki nong dih ganja hapoh shnong.
Halor kitei ki jingpynshai, ka Dorbar Shnong Mynkre ka buh ïa ki jingmana ban die kyiad beaiñ hapoh u pud u sam jong ka shnong, ban shong ha kino kino ki jaka ba dum, ban leh ïa kino kino ki kam sniew hapoh shnong bad la Maham ruh ba lada lap ïa kino kino kiba leh pyrshah bad pynkheiñ ïa ki aiñ , ka Dorbar Shnong kan pynshitom da kaba tyngeh katkum ki aiñ shnong bad kan aiti ruh sha ki bor jong ka aiñ.