Ha ryngkat ki jingkmen, la plie pyrda ïa ka platinum Jubilee ka St. Joseph’s Church Mawkhar Parish

Shillong, Nohprah 14: Ka St. Joseph’s Church Mawkhar Parish ha ka sngi U Blei ka la plie pyrda ïa ka jingrakhe ka jingsdang jong ka jingrakhe dap 75 snem (Platinum Jubilee) jong ka da kaba kyntiew ïa ka lama Jubilee da u Parish Priest u Fr. Leo Iawbor, ha ka jingdonlang u Rev Fr. Bensar Kharsati bad U Rev Fr Paulus Palamatam ki Assistant Parish Priest ha ryngkat kiba shah khot sngewbha bad baroh ki nongkitkam jong ka Parish Pastoral Council bad ki dkhot ki Jubilee committee bapher bapher.
Kane ka jingsdang ïa kane ka jingrakhe kaba long baroh shisnem bad kan kut ha ka 17 tarik u Kyllalyngkot 2027. Hadien ka jingplie ïa u snem jubilee la pynbud da ka mass bakhuid ba la pynmynta hi da u Parish Priest u Rev Fr Leo Iawbor.
Haba sneng ba kyntu U Rev Fr Leo u la ong ba kane ka sngi bad ki Sngi ban wan kin dei ki Sngi jingainguh, u snem ban phaidien ïa ka por ba la sdang ïa ka parish
ha u snem 1951.
U la ong ba kum ki paid riewngeit kane ka pateng dei ban sngewnguh ïa ki Lyngdoh mynshwa haba plie ïa kane ka Parish. U la pynkynmaw ba u (L) Rev Fr Constantine Vendrame u la long u nong maitshrah ban thied ka jaka jong u Keran Pal uba dei u Kharbengali.
U la ong ba U Fr. Vendrame u la ïaishah ïa kiba bun ki jingpyrshah bad bun ki jingeh ba la mad da kato ka pateng kaba 75 snem ba mynshwa ha kaba ki la im ha ka jingngeit kaba shitrhem.
U la ïathuh ba nadien u Rev Fr Vendrame kiwei ruh ki Lyngdoh kiba bteng ïa ka kam shakri Blei ki la mad bun ki jingeh, ki la ïaishah, ki la lenlade bad aiti nadong shadong ban plie ïa kane ka parish hajan jong ka Ïewduh.
U la kyntu ïa ki paid riewngeit ba ha une u snem jubilee donkam ban pynkhlaiñ ïa ka jingngeit, ban sngew trai ïa ka Balang.
U la pynpaw ka jing sngewnguh ïa baroh kiba la nohsynniang naduh ba sdang ïa kane ka parish naba dei ka jingrhem ka jingngeit jong ki ba ka parish ka la nangkiew ha ka jingngeit.
Ha ka por nohphai sngi la pynbud sa ki cultural program bapher bapher.
Ha kane ka sngi ka la don ruh ka jingduwai kyrpang na ki riewngeit na ka bynta baroh ki jingkyrkhu ba U Blei u la theh sei ha kine ki 75 tylli ki snem kiba ka Paish ka la ïohmad ïa u soh ka jingngeit lyngba ki Missionary ki shakri kiba la wan ban bet ïa u symbai ban prat ïa ka lynti.
Ka la don ruh ka jingduwai ha U Trai Kynrad ba un nang theh sei ïa ki jingaiei ha ki paid riewngeit ka Parish wat hapdeng ki jingeh bad ki jingtynjuh ba ïakynduh khnang ban nanglah ban suhthied ha ka jingngeit bad ban nang shitrhem ha ka jingieid, ka jingshakri bad ka jingïaroh ïa ka ktien U Blei da ki kam bad da ka jingim ba manla ka sngi.