Ha ryngkat ka jingpynshai, ka SKDEJHD ka la pynlong biang ïa ka jingpynkhalai nusib ïa ka 2nd prize

Khliehriat, Nohprah 08 : Ka Seiñ Kur Dkhar East Jaiñtia Hils District ha ka jingialang ba la pyniaid da u Adviser ka Seiñ Kur Dkhar, u bah M.H. Dkhar ha ka jing ïa don ryngkat lang ki pathai khubor bad ki paidbah kumjuh ruh kiba na ka kur Dkhar mynta ka sngi ka la pynlong biang ïa ka jingpynkhalai nusib ne ka lucky draw kaba na ka bynta ka 2nd prize namar namar ba ka la don ka jingthut bad mih ka jingbym hun ki paidbah ha ka jingpynkhalai ba la dep pynlong myn ha ka 28 tarik u bnai naiwieng.
U Adviser jong ka Seng Kur Dkhar East Jaiñtia Hills District, u bah Justine Dkhar u la kubur ba ka la don shisha ka jingbym iaid beit bad jingbakla ha ka jingpynkhalai nusib ba la pynlong ha katei ka 28 tarik bad ong ba kane kam dei satia kaba la leh khnang bad ka jingbakla ka dei hi ka jingbakla hynrei kam don eiei pat sha lyndet kaba da kawei ka jingmut ban leh khnang.
Ha kane ka sngi hakhmat ka jingsakhi lang ki paidbah, kumjuh ruh ki pathai khubor u bah Riborlin Shylla uba na shnong Khliehriat, u la u la shim ne jied ïa ka slip Lucky Draw ha kaba la pynbna ïa u number 21385 kum u number u ba ioh khur ïa ka 2nd prize kaba dei ka kali Bolero Pickup.
Haba pynshai sha ki paidbah u bah Justine Dkhar u la ong ba kum ka jingpynshai ha kaba iadei bad kato ka jingjia kaba la jia myn ha ka 28 tarik u naiwieng u kubur ba dei ka jingbakla ka jong u hi kaba um shym poi pyrkhat bad ka jingbakla ka dei tang namar ba u khlem rah ïa ki kti shalor hashwa ban shim ïa ki slip Lucky Draw bad u la bynrap ruh ba ka dei na ka daw ba jur ka jingkhriat ha kato ka miet, ka daw ka jingduh thiah naduh ka miet ba sdang ka fete bad ynda la law ïa ka jacket bad ka tupia nang jur ka jingkhriat haduh ba ym sngewthuh bad ym poi pyrkhat ba ki kti ki rung sha ki pla patlun bad ong ruh ba “Hadien ba la teh ïa ka khmat da ka jaiñ bad la ialam ïa nga, ngam tip dei na ka daw ka jingduh thiah ne tip na kano ka daw bad nga don ruh ka jingsngew kmen bad pyrkhat ba la dep ïa ka fete bad ka fete ka long kaba jop bad khleh lang ruh bad kata ka jingkmen ba jop ka fete khleh lang bad ka jingduh thiah duh dem te ha kaba kum kata ka por ka jingmut jingpyrkhat ka phai noh sha kiwei kiwei ki bynta, te na kata ka daw nga klet noh ïa kita kiei kiei baroh, te sa shisien nga pam map na phi ki para doh para snam ki lok ki jor, ki kha ki man ki paidbah kiba bun, kumjuh ruh ki para kur, para jait jong nga, shisha, shisha ngam shym don satia kano kano ka jingthmu sha lyndet da kaba ong ba ngan shu leh thok leh shukor, nga ruh ka pyrkhat hi ba kum uwei na ki riew rangbah ba na ka district, ka akor ka burom ka jong nga, ka longrynieng ka jong nga, nga lei ar shah nga sngewsih bad ngan poi pyrkhat ba kan long kan jia ïa nga kumne ha ka jingim ka jong nga, nga sngew la kum uto u briew uba lap ka samthiah ha por ñiah kali poi pynban sha ka tyngkhuh kali bad iap, ar miet ar sngi ngam kwah shuh ban bam ngam iohthiah ioh dem hynrei khatduh nga phai sha u Blei bad tang u Blei hi uba tip”
“Nga iohi ïa kiei kiei kiba mih ha ki social media, tang ban coment ruh ngan sngew nang, te to ai ba kane kan long kum ka jinghikai ïa nga marwei, dei kumne keiñ ba iakynduh kynsan kum kine kiei kiei ba ki briew pleng kin sa shu iap kyndit, te nga hangne da kaba burom, da ka jingieid, da ka jingsngew rit da ka mynsiem kaba sngew khia nga pan map na ki paidbah baroh naduh ki lok ki jur, ki para doh para snam, wat ju pyrkhat da kumwei, wat pyrkhat ba nga don ka jingthmu eiei sha lyndet ngam don kaba kum kata ka jingmut bad ym don hi ruh na ka liang ka kur ka jait ruh ki ban don ka jingmut ba sniew te nga khmihlynti ba kane ka jingpynkhalai nussib biang kaba mynta ka sngi la kumno kumno 90 haduh 95 percent kan ai jinghun ïa ki paidbah ha kaba pyniakhalai ïa kane ka 2nd prize” ong u bah Justine Dkhar.
Na ka liang u bah M.H.Dkhar ua la ong “ Myn ha ka miet jong ka 28 tarik naiwieng, ki don bun jait ki prize, kum ka bumper, lucky draw bad kiwei kiwei, haba pynkhalai ïa ki, ki la iaid beit iaid ryntih bad ïa kane ka iohi ruh lyngba ki rynsan pathai khubor bad social media, hynrei sngewsih ban ong ba khlem da poi pyrkhat ba ïa kane ka 2nd prize ba kan wan jia kumto ba ka don noh ka jingthut ha ka rukom shim ïa ki slip number, U Blei Trai kynrad uba iohi na jrong u tip ba ngim shym don satia kano kano ka jingmut jingpyrkhat kaba sniew ban leh thok leh shukor ïa kane ka 2nd prize lucky draw, kane ka dei ka jingpynshai kaba shai kdar sha ki paidbah lyngba ka jingdon lang ki pathai khubor ban rah ka khubor sha ki paidbah”
“Ngi tip baroh ba dei u bah Justine uba jied ïa ka slip lucky draw ha kato ka miet bad ha ka jingtip ka jong nga bad ha ka jingtip ka jong phi um pat ju don kano kano ka khana sniew ba budnam, um ju don kano kano ka kam thok, kam shukor ha ka imlang ka sahlang, ka jingbakla ha kato ka sngi hi ka dei na ka daw ba ka prokram ruh ka la long kaba heh bad duna ki nongtrei ban pyniaid, ka fete ka dei shisha kaba heh ha kitei ki ar miet bad ar sngi bad kumta haduh da poi ka por miet la lap sa ka thait ka jrem sa ka samthiah, sa ka khriat na kata ka daw ka pynlong ba kan jia kumto ha kato ka miet, ngim don eiei sha lyndet ngi lei katba ong ki paidbah ngi hun beit, ngi la shim ïa kane ka synjam ban pynkhalai biang ïa kane dei ba ngi sngap ïa ka sur jong ki paidbah bad ngi pynhun ïa ki paidbah”
La sakhi ba kane ka jingpynkhalai lucky draw mynta ka sngi ka dei kaba la mynjur da ki paidbah wat hashwa ba u bah Riborlin Shylla un mih shakhmat ban jied ïa ka slip kaba dei ka 2nd prize jong ka lucky draw bad hadien kane ruh kam shym la don satia kano kano ka jingkren ne jingthut na ka liang ki paidbah kiba la ïa don lang ha katei ka sngi bad ka jingpynkhalai ka long kaba iaid beit iaid rynthi ha ka rukom kaba khuid ba suba.
Hadien ka jingpynkhalai ïa kane ka lucky draw la pynbna ïa u number 21385 kum u number uba jop ïa ka lucky drwa jong ka 2nd prize bad la ioh ruh ïa ka jingkren ai khublei na u President Seng Kur Dkhar East Jaiñtia Hills District, u bah Teras Dkhar.