Nongpoh, Naiwieng 05: Ha kawei ka jingjia kaba sngewsangsot, uwei u rangbah bala tip kyrteng kum u bah Aiboklang Mynsong 33 snem ka rta naka shnong Shilliang Umdoh jong ka thaiñ Mawhati u la pynkut noh ïala ka jingim lade da kaba noh iap ha pung Umiam hynne ka step jong ka 5 tarik Naiwieng.
Katkum ka jingtip bala ioh lum la ong ba une u rangbah u don hapdeng ka jingshitom naka jingpang kaba ban haka met jong u bad dang shen ruh u dang mih na kawei ka jaka sumar ban shah sumar, hynrei la suba ba namar ka jingsohsat naka jingban jong ka jingpang u la pynkut noh ïala ka jingim ha Pung Umiam.
La ong ruh ba ki bahaiing kila pyrshang ban wad kylleng ki jaka ka thaiñ hadien ba u la phet noh nala iing, hynrei dei hynne ka step ba ki bahaiing kila ioh jingtip pynban bala lap ïaka metiap jong u na khrum ka jingkieng ka pung Umiam hajan Fire and Emergency Service.
Naka liang ki pulit kila leit mar mar sha katei ka jaka ban pynlong ka jinggtohkit ryngkat ka kynhun SDRF ban sei ïaka met utei u rangbah bad hadien ka jingtohkit bad pyndep katkum ki kyndon aiñ naka liang ki pulit kila aiti noh ïaka met sha ki bahaiing ban pyndep ïaka jinglehñiam ba khatduh.
