Ha phyllaw ïing u Bah Nehlang ha Umsning buh ki runar bym lah ithuh ïa ki bom IED

Nongpoh, Risaw, 12: Ki briew bym lah ban tip ki la buh ïa ka pla ïong ba la suba ba lah ban don u bomb IED ha phyllaw ïing jong u Bah Nehlang Lyngdoh ha Umsning, Ribhoi District ka la pynher syrngiew ïa kiba bun ki nongshnong ka Umsning bad khamtam ïa ki longïing kiba sah marjan.
Da ka jingshim khia mardor jong ki Pulit ka Ri Bhoi la lah ba pynsniew noh ïa u bomb khnang ba kan ym mih kano kano ka jingjia ba sngewsih.
Kane ka la jia ha janmiet sngi Satijaiñ ha ka por kumba 7:00 baje tam eiei. Ki Pulit ka Ri Bhoi ki la ïoh jingtip halor ka jingdon jong ka pla ïong ba la buh da ki briew bym lah ban tip. Mar mar khlem pynslem ki Pulit ka Ri Bhoi hapoh ka jingïalam u Senior Superintendent of Police V.S Rathore ki la leit ban pynlong ïa ka jingtohkit.
Ki Pulit ki la pyntip ruh mardor sha ka kynhun Bom Squad na Shillong kiba la wan poi khlem da pynslem na ka bynta ban wad bniah ne ban leh katkum ki kyndon khnang ba ka jingdon jong u bom kan ym buh jingma.
Haba sakhi halor ka jingshimkhia jong ki bor Pulit, naduh ka kynhun Bom Squad na Shillong bad ki heh Pulit ka Ri Bhoi ki la pynsted ban wad bniah bad ruh ban leh katkum ki kyndon.
Ha ka jingïakren bad ki lad pathai khubor, hadien ba la lah ban pynsniew noh ïa ki bom IED, u Senior Superintendent of Police ka Ri Bhoi u VS Rathore, u la ong bad pynthikna ba ki bom ba la lap na ka pla ïong ki dei ki bom IED bad dei lyngba ka jingshim khia ka kynhun Bom Squad na Shillong bad ki Pulit na Ri Bhoi la lah ban pynduh noh ïa ki bomb.
U la ong ruh ha ka jingwad bniah bad ka jingtohkit na ka pla ïong la lap ïa u bom IED uba la khia kumba 4.7 kg bad ryngkat ki 100 tylli ki detonator bad ruh 50 tylli ki lyngkhot nar barit kiba dei ki kynja tiar ban pynbthei ïa ki bom.
U la ïathuh ruh ba ki Pulit ki la lap ksai ruh ïa ki briew kiba wan buh ïa u bomb bad ka jingtohkit ruh ka dang ïaid shakhmat.
U la bynrap ruh ba ki Pulit kin sa pynlong ïa ka jingthwet kaba jur ban ïoh kem noh ïa kiba donkti.