Shillong, Jymmang 10 : Haduh 1,000 tylli ki longiing jong ka Sohiong ka Constituency ki la ïoh pdiang da ka song pisa kaba mar 10,000 tyngka lyngba ka skim MLA ba la sam paidbah da u MLA ka thaiñ Bah Samlin Malngiang ha ka jingïalang kaba long ha Madan Umsaw ha kane ka sngj Ba- ar.
Katei ka skim ba u MLA u sam ha katei ka sngi kadei na ka skim ba 2.50 klur tyngka jong u snem 2020 (hadien ba 25lak tyngka na katei ka pisa la pynlut ha ka jingsam jingïarap sha ki paidbah ha ka por ba jur bha ka khlam COVID). Nalor kitei ki 1000 tylli ki longiing, u Bah Samlin u la pynbna ruh ba na katei ka 2.25 klur tyngka, ki don pat haduh 30 tylli ki longiing kiba u la ai da ka skim iing baduk kaba long 75,000 tyngka kawei.
Nalorkata, ki don ruh haduh 100 tylli ki longiing kiba ïoh da ki tin sopiing, nangta ka skim na bynta ki skul, na bynta ki lanot shah lynshop mariang, ki jaka rep bad bun kiwei kiwei.
Haba kren ha katei ka jingïalang u Bah Samlin u la ong kumba u kular ha ka por elekshon kumta ruh u kwah ban pynurlong ba ka jingsam ïa ka skim MLA kadei ban long beit hakhmat u paidbah bad ruh da ka rukom kaba khuid bad kaba shai.
Nalorkata, u Bah Samlin u la pynbna ruh ba ha u bnai Risaw /Naiwieng un sa sam paidbah ïa ka skim kaba haduh 5klur tyngka kaba dei jong u snem 2021 bad 2022 ha kaba kin don haduh 4000 ngut ki nongïoh jingmyntoi.
“Shen ha u Jylliew mynta u snem ngin sa sam paidbah sa ki tin sop ïing sha ki 400 tylli ki longïing bad hadien kane ha u Nailur pat yn sam biang pat sa shisien sa sha ki 500 tylli ki longïing, ” u la ong.
Da kaba kam ba ka jingsam skim kadei sha baroh ki nongshong shnong kiba dei hok ban ïoh kampher la ki dei ne kim dei ki nongkyrshan u Bah Samlin u la ong ba katkum ki jingkheiñ ba ki ïoh ki don tang 6400 tylli ki longïing ba kyrshan ïa u ha ka elekshon ba la dep.
“Hynrei ha kine ki saw snem khlem da peit la ki dei ne kim dei ki nongkyrshan hynrei ngi la ïoh ban sam skim sha palat 9000 tylli ki longïing bad nga khmih lynti ba shwa ban kut u snem ngan ïoh ban sam lut sha baroh ki 11700 tylli ki longïing kiba don ha ka constituency, ” bynrap biang u Bah Samlin.
Utei u MLA u kyntu ruh ïa kito ki bym pat ïoh ba kin ïai shah ym ban kyrkieh namar shen ka pali jong ki ruh kan sa poi.
“Ngan ñiad ïa ki ummat jongphi kiba duk ba kyrduh da ka bor ba u Blei u pynkup hangi ki nongmihkhmat ba phi la jied. ”
Ha kajuh ka por u la kyntu ïa ki nongïalam ba kin peit ba ka jingai jingïarap kadei ban long beit nyngkong shwa sha kito kiba donkam hok.
Ha kane ka sngi la ïoh ruh ïa ka jingkren na u BDO, Bah B Sungoh nalor u MDC ka thaiñ Bah Sherbor Lyngdoh Mawlong.
