Ha paiñkhana hap i khyllung ba dang shu kha ha Nongpoh Civil Hospital

Nongpoh, Nailur, 22: Ka jingtorti haka rukom treikam bad ai jingshakri jong ka Civil Hospital Nongpoh ka la nang paw pyrthei katba nang mih ki sngi bad bun hi ka jingkynnoh ka mih na ki paidbah dei namar ka jingtorti bad bym shimkhia jong ki nongsumar ïa ki paidbah kiba leit shah sumar ha kane ka Hospital jong ka Sorkar.

Sa kawei ka jingjia ba sngewsih, ka la jia biang ïa kawei ka longkmie na ka shnong Umden Diwon kaba dang pun khun kaba la leit wad jingsumar ha Nongpoh Civil Hospital namar ka jingsuh kha hynrei kane ka longkmie kaba la tip kyrteng kum ka Monaliza Langi ka la kha ïa i khunlung ha paiñkhana ha ka por ba leit shabar haduh ba i khunlung i la khlad noh na kane ka sla pyrthei.

Katkum ka jingïathuh jong u kurim u Bah Richard Rympeit, kane ka la jia hynnin ka janmiet sngi Saitjaiñ ha ka por kumba 6:00 baje.

Halor kane ka jingjia u kurim jong ka Kong Monaliza u la ïathuh ba ka kurim jong u ka la suh kynsan ha ka por kumba 11:00 baje mynmiet sngi Thohdieng hashuwa kane ka jingjia bad mar mar la pynkit ïa ka sha PHC Umden na ka bynta ka jingsumar, hynrei ki Doctor ki la phah pynkit noh ïa ka Kong Monaliza sha Nongpoh Civil Hospital.  Namarba ka la miet eh u kurim u pan da ka kali Ambulance na ka PHC Umden ban leit buh sha Nongpoh Civil Hospital Nongpoh hynrei ki doktor ki la kyntait ban ai jingusmar da kaba aidaw ba kam dei ka kam ka bakyrkieh (Emergency Case).

Hadien ka jingshah kyntait ban ai ïa ka kali Ambulance da ki doktor jong ka PHC Umden u Bah Richard u la telephone ïa u paralok ban pynkit noh ïa ka kurim jong u ha ka por 1:00 baje eiei mynstep.  Hynrei ynda la poi ha Nongpoh Civil Hospital ym don briew satia ba ap bad peit bad kine ki arngut ki shikurim ki la hap ban shu shong thapngab habar bad ka Kong Monaliza ka dang ïoh rung hapoh ka Hospital haduh ka por 3:30 baje ne 3:45 baje eiei mynstep.

Dei hynnin ka sngi Saitjaiñ ha ka por kumba 4:00 baje eiei janmiet ka Kong Monaliza ka la sdang ban suh biang bad u kurim u la pyrshang ban leit khot ïa ki Nurse hynrei la kynnoh ba ki Nurse kim shym la patiaw satia bad ai pynban tang uwei u dawai kuli ban phah dih khlem da wan peit kumno ka Kong Monaliza ka long bad ha ka por kumba 5.45 baje eiei namar ka jingsuh palat ka kurim jong u Bah Richard ka la leit sha paiñkhana katba u kurim u dang mih shabar ban leit thied tiar. Dei ha kum kane ka por haduh ba i khunlung i la hap syndon ha madan bad ka longkmie ka la ur namar ka jingtlot shaba palat ka bor met na ka jingjur ka jingphlei snam.

Haduh kane ka khyllipmat ba ka Kong Monaliza ka la kha ïa i khunlung ha paiñkhana u Bah Richard u la pyrshang ban leit khot biang ïa ki Nurse hynrei ki la pyrshang ban pynap shi pynap kat haduh ba u Bah Richard um banse ban leit kynhied da kaba sur kaba tyngeh ïa ki Nurse kiba don ha ka kamram ha kum kane ka por.

Halor kane ka jingjia, ki nongïalam jong ka Hynñiewtrep Integrated Territorial Organisation (HITO) Umden Circle hapoh ka jingïalam jong u President u Bah Marius Mallai bad ki dkhot ki la leit mar mar sha Nongpoh Civil Hospital ban leit ïakynduh markhmat bad ki doktor bad ban pynrem jur ïa ka jingjia bad ïa ka jingkynnoh leh bym suidñiew jong ki nongtrei ka Nongpoh Civil Hospital kaba ju wanrah bun ki jingjia ba sngewsih ïa ki nongpang na ka por sha ka por.

Ka  jingkylli mynta ka long mano ban bahkhlieh ïa kane ka jingjia kaba la pynkthang haduh katta katta ïa ki arngut shi kurim bad kine ki shikurim ki la kyrpad ïa ka tnat ka Koit ka Khiah jong ka Sorkar Jylla ban shimkhia halor ha kane ka jingjia bad ka jingnang hiar ka jingai jingshakri jong ka Nongpoh Civil Hospital ha ka jingshakri ïa ki paidbah ka them Ribhoi.