Mawkyrwat, ‘Nailar 04 : Ka Federation of Khasi Jaintia & Garo People ( FKJGP) South West Khasi Hills District hapoh ka jingïalam u bah Kenesjune L. Nonglait President bad u bah Balse Kharbani Secretary mynta ka sngi ka 4 tarik u ‘Nailar, 2025 ka la leit khynra Trading Licence ha ka shnong Nonghyllam bad Nongjri, South West Khasi Hills District.
Lah ban kdew ba ha ka jingleit khynra trading License la lap ba don katto katne ki dukan bym don trading licence, bad don ruh ki dukan ba la khang khyrdep hi hadien ba la ïohi ïa ka jingkhynra trading license ka seng ha kine ki jaka ba kynthup ïa ka Nongjri, Umsur bad Nonghyllam.
La ong ruh ba ha kane ka jingkhynra don ruh ki dukan kiba biang ki kot ki sla bad trading licence bad ym tang kata ka seng ka la khang khyrdep ruh ïa kine ki bym don trading licence.
Na ka liang ka seng, ka kyntu ïa ki paidbah ka thaiñ khamtam hadien ba la ïohi ba ka Sorkar Assam ka la khynra ïa ki briew bym dei trai ri trai muluk, ba kin sangewbha ban peitngor ha kaba ïa dei bad kane ka jingwan rung kyrthep ki briew ba nabar.
Ka seng ka la shim ruh ïa ka sien jam ba nangne shakhmat ngin buh kawei ka Gate ban peit ïa ki briew kiba nabar, namar ba ngi ïohi ba ki don ki briew kiba shong ha ki kali, hynrei ynda la poi ha kine ki jaka ki la sakma kylleng bad ngin ym lah ban tip ki leh shaei ngim pat buh ka jaka haei, lyngba kane ka khyrdop ka kyrmen ba kan ïarap ban tehlakam ïa ka jingwan rung ki briew hapoh ka jylla jong ngi.
