Ha Nongbah Shillong yn pynlong ïa ka 72nd Junior National Baksetball Championship, North East Zone

Shillong, Nailar 07 : Ka Jylla Meghalaya sa shisien pat kan sa ïoh ban sakhi ïa ka lympung ïalehkai kaba heh hapoh ka ri India ha kaba ka Basketball Federation of India (BFI) ka la aiti sha ka Meghalaya Basketball Association ban pynlong ïa ka wat ba nyngkong (First phase) jong ka lympung 72nd Junior National Basketball Championship (Men and Women) kaba dei na bynta ka North East Zone ha Nongbah Shillong naduh ka 14 tarik haduh 17 tarik Risaw 2022.
“Ka Basketball Federation ka dap da ka jingsngewkmen ban aiti sha ka Meghalaya Basketabll Association ban pynlong ïa ka wat ba nyngkong jong ka 72nd Junior National Basketball Championship for Men and Women jong ka North East Zone ha Nongbah Shillong naduh ka 14 tarik haduh 17 tarik Risaw 2022, ban jied ïa ki kynnun kiban sa ïashim bynta ha ka 72nd Junior National Basketball Championship for Men and Women ha Karnataka naduh ka 21 tarik haduh 28 tarik Nohprah 2022,” ong u kyrwoh khubor na u Chander Mukhi Sharma General Secretary ka BFI.
Ka BFI ka la kyntu ïa ka MBA ba kan pynkhreh na bynta katei ka Championship katkum ki jingkdew jong ka BFI. La ïathuh ruh ba na ka liang ka Inspection Committee jong ka BFI kan sa wan ban jngoh ïa ki jaka ïalehkai. La bhtah ruh ban pynbiang ki jaka sah ban pynlong ïa katei ka lympung kaba ïaid beit ïaid ryntih.
Na ka liang ka BFI ka la kyntu ïa ka MBA ba kan phah ka jingthoh ban pdiang pynlong ïa katei ka lympung ryngkat ki jingbatai kiba bniah ha kaba ïadei bad ki jaka ïalehkai, ki jaka sah, ka bam ka dih, ka leit ka wan bad kiwei kiwei na bynta ki nongïalehkai.