Ha nongbah Delhi sawa jam ka sur ban ai jingithuh noh ïa ka Ktien Khasi ha Khyrnit ba Phra

By Mawphor Editor On Oct 1, 2023

Shillong, Nailur 30 : Ka dei ha ka sien kaba nyngkong eh ba ki nongshong shnong na Meghalaya kin mih ban leit pynsawa jam ïa ka sur ha nongbah Delhi ban dawa pynrung noh ïa ka Ktien Khasi ha ka Khyrnit kaba Phra.
Ïa katei ka jingdawa paidbah na ka sorkar pdeng kaba long ha Jantar Mantar, Delhi la lamkhmat da ka Khasi Authors Society bad kyrshan da ki kynhun bad ki sengbhalang bapher bapher na kylleng ki bynta jong ka rilum Khasi bad Jaintia. Nalor kine, wat ki Myntri Sorkar ba kynthup ïa u Bah Paul Lyngdoh bad Kong Ampareen Lyngdoh nalor ki MLA bad ki sengsaiñpyrthei bapher bapher kiba la wan ban snohkti lang kum ka dak ban pyntylli lang ïa ka jingdawa na ka sorkar pdeng.
Jan baroh ki nongkren la ka long naduh ki Myntri Sorkar, na ka Khasi Authors Society haduh ki nongïalam jong ki sengbhalang ki la pynpaw ba ka Ktien Khasi kala dei hok ban ïoh rung noh ha ka Khyrnit kaba Phra jong ka Riti Synshar jong ka Ri.
“Ka sorkar ka la dep ban phah ïa ki jngpynshai ba la pan da ka Ministry of Home Affairs kiba ïadei bad ka jingdawa ban pynrung noh ia ka Ktien Khasi ha ka Khyrnit kaba Phra jong ka Riti Synshar ka Ri,” ong u Myntri ka tnad Arts and Culture, Bah Paul Lyngdoh.
Shuh shuh u ong ruh ba ka sorkar jylla kala dep ban phah ïa ka jubab halor ka jingpan jingpynshai jongka MHA ha kaba ïadei bad ka Resolution na ki jingtip kiba ka ïoh na ka Khasi Author Society. “Ngi sngewthuh ba mynta ka la don ka thup jong ki Ktien kiba kin sa ai jingmynjur kiba don baroh 38 tylli bad ka ktien Khasi ka don ha kane ka thup jong ki ktien bad ngi khmih lynti ba hashwa ba ka samoi treikam jong kane ka Parliament kan kut, ïa kane ka kam kadei ban poi sha ka thong” ong u Bah Paul.
Na ka liang ka Myntri ka Koit ka Khiah, Kong Ampareen Lyngdoh ka la ong ba katei ka jingïakhih ha Delhi kadei ka buit kaba thymmai bad kaba ym pat ju leh mynno myno bad ka sorkar jylla kala wan ban ai mynsiem ïa kane ka jingïakhih ba la pynlong da ka KAS.
“Dang shen ka sorkar jylla kala wan ïakynduh ïa u Myntri Rangbahduh ka ri ban pynkynmaw biang ïa kitei ki jingdawa baroh ban ïoh noh ïa ka jingithuh ha ka Khyrnit kaba Phra,” ka la ong.
Kiba bun ki nongïalam jong ki sengbhalang ki la pynpaw ïa ka jingkyrmen ba kane ka jingtylli lang kawei ka buit kawei ka bor bad kawei ka sur kan pynskhem ïa ka jingïakhun ba ka Ktien Khasi kan rung noh ha ka Khyrnit kaba Phra.