Shillong, Jylliew 15: U myntri ka tnat Tribal Affairs ka jylla Tripura u Vikash Debbarma ha ka sngi Palei u la wan ban kynduh ïa ki myntri ka sorkar jylla ba kynthup naduh u Symbud Myntri Rangbah u Bah Sniawbhalang Dhar, u Myntri ka tnat Revenue u Bah Kyrmen Shylla bad ruh u Myntri ka tnat Social Welfare u Bah Paul Lyngdoh ban kyrpad ïa ki ba ka sorkar jylla kan ai jaka na bynta ban tei ïa ka Tripura Bhavan bad ka Hostel ha nongbah Shillong.
Haba kren sha ki lad pathai khubor u Vikash Debbarma ula ïathuh ba na ka liang ki myntri ha ka sorkar jylla ki la kular ban ai jaka ha New Shillong Township.
“Na ka liang ki myntri ki la kular ban pynïoh jaka na bynta ka jylla Tripura ha New Shillong Township bad lehse tangba kim pat pynthikna haduh katno ka jingheh ka jaka kin ai sha ngi,” u la ïathuh.
“Kumba phi tip ba ka jingdonkam ban shna ïa ka Hostel ka dei namar kiba bun bah ki samla pule jong ka jylla ki wan ha Shillong ban wan pule bad ruh ka jingdonkam ïa ka Tripura House ka dei na bynta ki nongshong shnong ka jylla kiba wan donkam bad kiba wan shah sumar ha Shillong,” u la bynrap.
U Bikash u la pynpaw ïa ka jingsngewnguh ïa ka sorkar jylla kaba la kular ban ai jaka sha ka jylla Tripura na bynta ban ïoh tei ïa kine ki ïing na bynta ki nongshong shnong ka jylla Tripura.
“Nga ai khublei ïa ki myntri sorkar Meghalaya namar ki la shim khia ban pynbiang jaka naka bynta ban tei daka Tripura Bhawan bad ka Hostel hapoh ka thain New Shillong bad ïa kane ka rai ba khatduh yn sa shim hadien ka jingïakynduh biang bad ki heh sorkar Meghalaya bad Tripura ha kine ki sngi kiban wan” la ong u Vikash Debbarma.
