Jowai, K’Lyngkot 03 : Ha shwa ba u Sohblei (Phadar) Sambha Kyndait un pynlong ïa ka jingkñia Mass bakhuid kaba nyngkong jong u ha ka ïingmane kaba la ainam ha ka Dohnud bakhuid tam U Jisu ha Mihmyntdu, u la ïoh ïa ka jingpdiangburom ym tang na ka kynhun ñiam ka Balang Katholik, hynrei la pdiang burom ïa u da ka Kur Kyndait, na ka Kur Shyrmang bad na kito baroh ki jaitñiam kiba u Phadar Sambha u dang don jingïadei. Ïa ka jingrwai pdiang burom (Welcome song) la rwai da ka Kynhun Nongrwai jong ka Balang Mihmyntdu kaba ki la shna da ki kyntien shongsbai kiba sngewtynnat bad ki kyntien kyrkhu kyrdoh ïa u Sohblei Sambha Kyndait.
Ha ka por 10:00 baje mynstep u Sohblei Sambha Kyndait u la pynlong ïa ka jingkñia Mass kaba nyngkong jong u ha kaba la synran da u Sohblei Martin Shylla Vicar General ka Jowai Diocese bad u Sohblei Augustine Lamin, Acting Parish Priest ka Parish Jowai ha ryngkat ka jingïadonlang ki Sohblei na ki Parish bapher bapher jong ka Jowai Diocese.
U Sohblei Sambha Kyndait haba kren ha kane ka sngi, u pynpaw ka jingsngewnguh ïa kiba ha ïing ha sem, ïa ka Kur Kyndait, ka Kur Shyrmang, ïa ki parabangeit ka Balang shnong Mihmyntdu, ïa ki lok ki jor, ïa ki para shnong parathaw, ïa ki Phadar, ki Sister bad ki nonglehbha kiba ai mynsiem bad kiba duwai na ka bynta jong u ba un poi shaduh kane ka kyrdan Lyngdohñiam hapoh ka Balang bad u kular ban duwai na ka bynta jong ki baroh ba U Blei Trai Kynrad Un theh kyrhai ki jingkyrkhu kyrdoh jong u halor jong ki.
La nangpynkhraw pynphuh pynphieng ïa kane ka sngi da ka jingïadon lang u Most. Rev. Ferdinand Dkhar DD, Bishop ka Jowai Diocese, u Pa Doloi Puramon Kynjin, Doloi ka Elaka Jowai, ki Pastor, ki Tymmen basan, ki Longsan na ki Kynhun Niam bapher bapher, ki Phadar, ki Sister, ki Brother, u ma Gresentus Susngi MDC JHADC bad kiwei de ki riewkhmat kiba la shah khot sngewbha.
Ha kane ka sngi ka la long ka sngi kaba phuh kaba phieng bad ka jingpdiang burom ïa u Phadar Sambha Kyndait (Lyngdohsohblei) da ka Shad, ka rwai tynrai, ka jingot Cake bad ka jingkren sngewnguh ïa U Blei da ka Kur Kyndait, ka Kur Shyrmang bad na ka Balang ïa kane ka jingjied jong u ïa u Sambha Kyndait ban long u Lyngohsohblei ban shakri ïa U Blei, ïa ki paidriewngeit bad ïala ki para briew ban bha ban miat ka longbriew man briew.
