Ha Meghalaya yn pynlong ïa ka National Table Tennis C’ship 2022

Shillong, Ïaïong 01: Ka Meghalaya kan sa pynlong ïa ka lympung ïalehkai Table Tennis kaba 83 kaba la tip kum ka 83rd National Table Tennis Championship 2022, kaba dei ruh ka lympung ïalehkai kaba hehduh napdeng ki jingïalehkai ba ka jylla kala pynlong ha kine ki 50 tylli ki snem.
Ïa kane la pynbna da u Myntri Rangbah ka jylla u Conrad K Sangma ha ka sngi Palei ha ka jingïakynduh bad ki lad pathai khubor. “Kane kadei kawei na kiba heh tam bad ha kajuh ka por kadei ruh ka sien kaba ar ïa kaba kum kane ka lympung ïalehkai table tennis la pynlong ha ka thaiñ Shatei Lam Mihngi ka ri India, ngi khmih lynti ba kin don haduh 650 ngut ki nongïashim bynta ba kynthup ïa ki coach, ki nongïarap bad napdeng kine 450 kidei ki player,” ong u Myntri Rangbah.
U Myntri Rangbah u la ïathuh ruh ba jan 300 tylli ki kamra la dep ban pynkhreh na ka bynta ki nongwan ïashim bynta. “Ngin pynlong ïa kane ka tournament hapoh indoor training center ha NEHU Shillong ha kaba ngi khmih lynti ba kin don 20 tylli ki table ïalehkai,” u la ong.
“Kane ka lympung ïalehkai kan sdang naduh ka 18 tarik haduh ka 25 tarik mynta u aïong 2022, ha kaba ngi da khmih lynti ba kin don shibun ki nongwan ïashim bynta kumjuh ruh na ki nongpynïaid jong ki association jong ki jylla bapher bapher kynthup ïa u Myntri Rangbah ka Haryana uba dei ruh u President jong ka Haryana Table Tennis Association uba la pynbna ruh ban pynlong ïa kane ka lympung hangne.”
“Ngai ai khublei ba u la shim kane ka sienjam bad ha kajuh ka por nga ai khublei ïa u President jong ka Meghalaya Table Tennis Association kumjuh ruh ïa u vice president u Bruce Marak bad ruh ïa u Chiranjiv Chaudhry uba dei u vice president jong ka Table Tennis Federation of India, nangta ïa u general secretary jong ka Meghalaya Table Tennis Association kiba la ïasnohktilang ban pynlong ïa kane ka lympung kaban ïaid beit ïaid ryntih,” la ong u Conrad.
Shuh shuh u la ong ba ka jingpynlong jong ïa kane ka lympung kadei ruh shi bynta ka jingrakhe jong ka jylla ïa ka jingdap 50 snem ka jingïoh la ka jong ka jylla kaba pura, bad kadei ruh ka lympung kaba ka sorkar kala dep ban ïakren ban pynlong ïa ki tournament kiba heh, kumta ruh kane kadei ka bynta jong ka jingrakhe dap 50 snem bad kin don ruh shibun ki jingpynbyrngia na bynta kane ka National Table Tennis Championship kaban sa long shen.
“Nyngkong ïa ki jingïalehkai bapher bapher la pynpep noh shwa na kiba bun ki daw hynrei kane kan long ruh ryngkat bad ka jingrakhe ïa ka jingdap 50 snem jong ka jylla bad kumjuh ruh na ka DIPR nangta na ka tnad ki kam jngohkai pyrthei ïa kaba yn pynlong ha kine ki sngi ba pynlong ïa kane ka jingïalehkai.”
“Ngin sa pynlong ruh ïa shibun ki lympung ïalehkai hadien kane hynrei kumba nga la dep ban pynbna ba kane kadei ka lympung kaba nyngkong tam kaban sa long noh shen,” la ong u Myntri Rangbah.
U Myntri Rangbah u la ïathuh ruh ba ka jinglut jingsep ha kaban pynlong ïa kane ka lympung ka kot sha ka 1.5 klur tyngka. U la ïathuh ruh ba ki don 10 ngut ki player jong ka jylla Meghalaya ha ki ar tylli ki team kiban ïashim bynta ha kane ka lympung.