Ha Meghalaya bun tang ki Politician, ym don hi ruh wat tang uwei u Statesman: Prof. L.S Gassah

Shillong, Nailur, 11: U Prof, L. S Gassah u la kynthoh da kaba ong ba ha kane ka jylla Meghalaya ki bun sa tang ki Politicians hynrei ym don hi ruh wat tang uwei u Statesman.
Kane ka jingkynthoh jong u Prof. LS Gassah ka long halor ka jingai jingkren kum uwei na ki riewshemphang ha ka jingrakhe ïa ka sngi ka thoh ka tar ha ka lympung ïamir jingmut halor ka phang “Ka Jingieit Ri U Khasi Ha Ka Mynnor Bad Ka Mynta” ba la pynlong da ka Khasi Authors Society (KAS) ha ka sngi saitjaiñ.
Haba pynksan ïa kane ka jingkren ka jong u, u Prof. Gassah u la ong, “phra snem hadien ba ka jylla Meghalaya ka la ïoh ïa ka Autonomous District Council, ka la mih sa ka jingïapyrta “No Hills State No Rest. Ki Khasi ha kito ki por ki ïeng ïatylli lang kawei ban dawa ïoh noh ïa la ka jong ka jylla, namarkata ka la pynlong ïa ka Sorkar India ban ai shuwa da ka Autonomous State ha u snem 1970 hynrei ka jaidbynriew ha kito ki snem kam hun satia bad namar ka jingbym kynran dien ki paidbah ha ka jingïatylli lang kawei, ka la pynlong ïa ka Sorkar India ban ai noh shisyndon ïa ka jylla kaba pura ha ka 21 tarik Kyllalyngkot, 1972.”
“Mar syn ïoh ïa ka jylla lajong ki Khasi jong ngi ki lah shongthait noh, la ïasam ïa ki shuki Minister bad kiwei kiwei hynrei ki klet noh ban pynbeit ïa u pud u sam hapdeng ka jylla Meghalaya bad Assam. Don napdeng ki ophisar jong ka Jylla Assam kiba la ïohi jngai ïa kane bad ki la buhrieh noh ïa ki Dulir kiba ïadei bad u pud u sam bad ki la rah noh shisyndon sha Assam. Ynda lah wan ka Chandrachud Committee ban bishar ïa u pud u sam, jop ka Assam namarba ka lah ban pyni ïa ki dulir kiba biang,” la ong u Prof. Gassah ba la shong thait jong ka skulbah NEHU.
Haba buh jingkylli ïa ki Nongthawaiñ, u Prof, Gassah u la buh jingkylli da kaba ong, “shaei ka jingieit ri ba wat ki riewhyndai ruh ki ïa bunkam tang ban ïa knieh shuki bad ban ïoh ha ka bor?”
Da kaba kynnoh ba ki nongïalam kiba mynta ruh ki dang ïai don ïa kane kajuh ka jinglong, u Prof. Gassah u la ong, “ha jylla jong ngi lah bun sa tang ki Politician hynrei ym don uwei ruh u Statesman.”
Ha kane ka jingïamir la ïashim bynta da ki riewshemphang kum u Rev. (Dr) O. L Snaitang, u Prof, O. R. Challam, u Associate Proffessor ba la shongthait ka Kiang Nongbah College, Jowai, u Prof. Loniak Marbaniang u nonghikai ba la shongthait ka skulbah NEHU.
La pynsdang ïa ka lympung jingïamir da u Rev. (Dr). O. L Snaitang uba la kren shaphang ka histori jong ka jingieit ri u Khasi naduh ka mynnor bad haduh mynta da kaba ai nuska ba ka ri bad ka jaidbynriew ka la sei ïa ki riewieit ri kum u Syiem Tirot Sing bad ka Phan Nonglait, u Bormanik ka Hima Mylliem, u Sngap Sing Syiem bad u Kiang Nangbah kiba la ïaleh pyrshah ïa ka bor bakhlaiñ jong ki Phareng.
U la ïa nujor ba ka jingieid ri hapdeng jong kine ki khlawait ka la mih namar ka jingieit ïa la ki briew lajong bad ïa ka khyndew ka shyiap da ka dohnud baroh bad ka jingtip thikna ïa u pud u sam. “Watla ki ladei ban hap ïaleh pyrshah ïa ka bor jong ki Phareng hynrei ki long shlur khlem da randien namar ka jingieit kaba shisha,” u la ong.
“Phewse, kane ka juk jong ngi mynta ka ïaleh pyrshah para jaidbynriew. ïa ka Sorkar kaba ki jied hi da lade hynrei watla katta ruh kim lah ban pynkhih bad wanrah ïa ka jingsuk jingsaiñ bad ki jingdawa ka ïai tei bad ka Sorkar ka ïohlad ruh ban ïai pynslem ïa baroh ki mat jingdawa tang namarba kam don ka jingïashim bynta lang hapdeng jong ngi para jaidbynriew,” la kynthoh u Rev. (Dr). Snaitang.
“Ka jingkyrmen ka dang don ïa ka ri baieit jong ngi lada ngi pynïoh ïa ka mynsiem ka jingïalong shitylli, ïatrei lang hynrei ym da ka mynsiem ban ïa shetkylla ne ban khwan myntoi tang sha ka malade,” la ai mynsiem u Rev. (Dr). Snaitang.