Shillong, Naitung : U MLA ka Mawlai u bah PT Sawkmie ha ka sngi Saitjaiñ ba la lah u la pynpaw ba ha ka shnong Mawlai ym ju don politik ha ka ba ïa dei bad ki kam pynroi namar ki paidbah ka thaiñ ki pdiang sngewbha la ka dei ki kam pynroi na u MLA ne u MDC ne u MP kumjuh.
ïa kane u Bah PT Sawkmie haba kren hadien ba la dep plie ïa ki ar tylli ki motorable road ne surok dewbilat ha dong Laitlum ka ba don ha Mawtawar, ka ba dei ruh ka lynti ïaid ka rung sha ïing mane jong ka Balang Presbyterian kaba don ha kane ka jaka.
Nalor kata u la ong ruh ba ki paidbah nong Mawlai ki long kiba stad bha ha ka ba ïa dei bad kane ka bynta.Ha kajuh ka por u MLA u pynpaw ruh ka jingsngewkmen ba kum u nongmihkhmat u la lah ban pynïoh ïa kine ki kam pynroi ym tang hapoh dong Laitlum hynrei ha ka shnong Mawtawar bad hapoh ka Mawlai Consti tuency hi baroh kawei.
Ha kane ka sngi plie la don ryngkat u Rangbah Shnong bah Cornelius Kharkongor, rangbah dong bah Phlas Kharumlong ki nongïalam ka UDP Mawlai, ki nongïalam ka UDP Women Wing bad kiwei kiwei.
Na ka liang u Rangbah shnong uba la ai jingkren ha kane ka sngi u la ai khublei bad pynpaw ka jingsngewnguh ïa u MLA halor kine ki kam pynroi ba u la pynïoh hapoh hapoh kane ka dong bad ha ka shnong Mawtawar hi baroh kawei.
U ïathuh ruh ba kine ki lynti ïaid baroh ar tylli ha kine ki sngi ba la leit ki la long kiba ktieh bha bad ba shem shitom bha ban ïaid, khamtam ha ka por mynmiet bad ha ka por lyiur.
Katba u rangbah dong ka Laitlum, bah Phlas Kharumlong uba la pynpaw ba kum ka dorbar dong ka shlei da ka jingkmen bad sngewnguh ïa u Bah PT Sawkmie ha ka ba ïa dei bad ki surok.
Ha ka juh ka por u la pynpaw ka jingangnud jong u ba kum ka dong ki dang kwah ban ïohi biang ïa u Bah PT Sawkmie ban long u MLA jong ki hadien ka ilekshon 2023 khnang ba un lah ban pyndep ïa ki jingangnud jong ki paidbah nongshong shnong.
