Shillong, Nohprah 12:U Nongai ktien jong ka Voice of the People Party (VPP) u Dr Batskhem Myrboh u la ong ba ka jingbym ïoh ILP ha ka jylla ka dei namar ka jingshim sting jong ki seng saiñ pyrthei naduh ki snem kiba kham mynshuwa ha ka por ba synshar ka Congress bad kumjuh ynda la synshar ka NPP.
Haba kren sha ki lad pathai khubor u Dr batskhem u la ong ba lada peit ïa ka jingdawa ILP ha Manipur kaba dang sdang ha u 2015 baroh ki seng saiñ pyrthei ki don lang ha ka juh ka lynnong naduh ka Congress, ne BJP bad kiwei de ki seng ha ka jingpan ILP a ka sorkar pdeng katba ha ka jylla jong ngi kam don satia ka jingdawa lang kaba khlaiñ bad kaba skhem na ki seng saiñ pyrthei ha ka jylla.
“Lada phi peit ka BJP kam kyrshan ïa ka jingdawa ILP, ka Congress ruh kam kwah ZILP, ka NPP ruh kam pyni dak kaba skhem ba ka kwah ban pyntreikam ILP ha ka jylla, ka UDP ruh ka dawa ba ka ILP kan dei ka Modified ILP bad kiba dawa ILP ha ka jylla ki dang dei beit tang ki seng bhalang,” u la kynthoh.
U la ong ruh ba kat kum ka sur kaba mih la ju ïohsngew ba ka jingdawa ILP ha ka jylla ka dei beit tang ki seng bhalang ym ki seng saiñ pyrthei bad ka sorkar bad dei namar kane ka daw ba ka sorkar pdeng ruh kam ai ILP satia ha ka jylla.
“Ka sorkar pdeng lei ka pyrshang katba lah ban ym pyntreikam ïa ka ILP ha ka jylla phi pyrkhat haba kam don ka jingdawa kaba khlaiñ na ka jylla baroh kan shu ai mo,” u la buh jingkylli.
Haba kren ïa ka jingdawa ILP kaba la mih na ki seng saiñ pyrthei baroh bad ka jingmynjur lang ïa ka Resolution dawa ILP da ka iing dorbar thaw aiñ ka jylla ha ka 19 tarik 2019 hadien ba la mynjur ïa ka CAA, u la ong ba ka dei tang ka jingpynthame ïa u paidbah.
“Lada pynshong nongrim ïa ka jingkam jong ki ba ka jingdawa ILP ha ka jylla dei namar ba la mynjur ïa ka CAA da ka Parliament ngam sngew shongnia namar jan baroh kawei ka jylla la pyllait na ki jingtreikam CAA bad nga sngew ba ka jingkwah ILP jong ki ka dei beit namar ka don ka jingtieng saiñ pyrthei bad ka jingshah pynbor ha u paidbah,” u la ong.
Shuh shuh u la bynrap ba ka jingdawa ILP lei kat kum ka jingsngewthuh jong u kan nang kham jwat ha kane ka kynti namar ïa ka Khasi bad Jaintia Hills district kaba don ha ka preamble ka Bengal Eastern Frontier Regulation, 1873 la weng syndon bad ong ruh ba kam don kano kano ka jingpyrshah halor ka jingweng noh ka sorkar pdeng ïa ka Khasi bad Jaintia Hills na ka thup jong ka jintreikam ka ILP.
U la ïathuh ba na ka liang ka Party kan pyrshang ban pynïoh ILP ha ka jylla ban pynurlong ïa ki jingdawa kiba u paidbah u la angnud la slem bah.
