Ha Lok Sabha dawa ka TMC ban pynrung ïa ka ktien Khasi bad Garo ha ka Khyrnit ba phra

Shillong, Nailar, 02: Tang shitaiew kynthih hadien ba ki MLA ka Trinamool Congress na Meghalaya ki la leit pyrta shla ha New Delhi ban dawa pynrung ïa ka ktien Khasi bad Garo ha ka Khyrnit Baphra jong ka Riti Synshar ka ri India, mynta ka sngi ka Parliament ka la pynrung ïa ka jingïatai haor kane ka mat ha ka Zero Hour.
Dang ha ka 26 tarik u bnai baladep ka kynhun ki MLA jong ka TMC hapoh ka jingïalam jong u Dr. Mukul Sangma bad u Bah George Lyngdoh ryngkat lang bad ki MP ka TMC ki la pynlong da ka jingrah plakad shabar ka Parliament ban dawa ba dei ban pyndam noh ïa ka jingïasoi ïa ka Memorandum of Understanding (MoU) ïa pynbeit pud hapdeng ka Meghalaya bad ka Assam bad ban pynrung ïa ka Ktien Khasi bad Garo hapoh ka Khyrnit Baphra.
Ha ka Zero Hour, u MP ka TMC u Sudip Bandopadhyay u la rah ïa kane ka mat ba la dawa ban pynrung ïa ka ktien Khasi bad Garo hapoh ka Khyrnit Baphra ka Riti Synshar ka ri India.
U Bandopadhyay u la ong ba katkum ka Article 29 jong ka Riti Synshar ka ri India, ki nongshong shnong kiba la don la ka jong ka ktien, ki dak thok bad ka riti ka dustur ki don ia ka hok ban ïoh ia kajuh ka kyrdan. Hapoh ka Meghalaya State Legislature Act 2005, ïa ka ktien Garo bad Khasi la pynbna kum ki Associate Official Languages.
Katkum ka jingpynsngew jong une u MP ka TMC, ka ktien Khasi ka dei ka ktien Astro-Asiatic ba la kren hapdeng ki jaidbynriew kiba shong ha Meghalaya bad ha ki rilum ka jylla Assam.
U la ong ba ka ktien Garo ka dei ka ktien Tibeto-Burmese jong ka kynhun Boro-Jingpko ïa kaba la kren hapoh ka jylla Meghalaya, Assam, Tripura bad Nagaland.
Katkum ka Khanasamari 2011, ki don palat 13 lak (46.5%) kiba kren ïa ka ktien Khasi bad 9 lak (31.5%) kiba kren ïa ka ktien Garo.
U Bandopadhyay u la pyntip ba ha ka 27 tarik, Nailur, ka Iingdorbar Thawaiñ ka Jylla ka la pdiang ïa ka rai ban phah dorkhas sha ka Sorkar Pdeng ban pynrung ïa ka ktien Khasi bad Garo ha ka Khyrnit Baphra jong ka Riti Synshar jong ka ri.
“Ngi kyntu ïa ka Sorkar Pdeng ba kan shimkhia ïa kane ka jingdawas jong ka Jylla Meghalaya ban pynrung ïa ka ktien Khasi bad Garo ha ka Khyrnit Baphra,” ong une u MP.
Halor kane, u MLA ka TMC na Meghalaya u Bah George B Lyngdoh u la ai khublei ïa ki nongïalam jong ka party, khamtam ïa ka Chairperson AITC ka Mamata Banerjee, ïa u National General Secretary u Abhishek Banerjee, ïa baroh ki nongïalam ha Lok Sabha bad Rajya Sabha kiba la kren na ka bynta ka jingdawa jong ki nongshong shnong ka jylla Meghalaya.
“Ki la kren ïa ka jingdawa ba kongsan tam ban pynrung ïa ka ktien Khasi bad Garo hapoh ka Khyrnit Baphra,” ong u Bah Lyngdoh.
Une u MLA ka TMC u la ong ba ym pat ju don kano kano ka National Party kiba kren ïa ka sur jong ki MLA bad ki MP kiba mihkhmat ïa ki paidbah ka Jylla bad ka Sorkar Pdeng, ban ïashim bynta ha ka jingïakhih shabar ka Parliament halor ka jingdawa ban pynrung ïa ka ktien Khasi bad Garo ha ka Khyrnit Baphra ka Riti Synshar ka ri India.
“Ngin sa kren shuh shuh sa kiwei pat ki mat kiba kongsan jong ka Jylla, kaba long ka sur jong ki paidbah. Ngi ai khulei sa shisien pat ïa ki paidbah kiba la ai jingkyrshan ïa ngi, kiba la don ryngkat bad ka Party, kiba la don ryngkat ban kren ha kaba ïadei bad ka jingpynrung ïa ka ktien Khasi bad Garo ha ka Khyrnit Baphra ka Riti Synshar ka ri India,” u la ong.