Nongstoiñ, Rymphang 01: Ka ophis treikam jong ka District Legal Services Authority (DLSA) West Khasi Hills District Nongstoiñ mynta ka sngi, ka la pynlong ïa ka prokram pynsngewthuh paidbah halor ki kam aiñ kiba ïa dei bad ki paidbah bad ki jingmyntoi kiba ki paidbah ki dei ban ïoh lada ki don jingtip bad ka aiñ.
Ïa kane ka prokram la pynlong ha ka shnong Lawbyrtun kaba hap hapoh ka Mawthadraishan C&RD Block, Eastern West Khasi Hills District, Mairang halor ka phang ‘Opening Doors For Education To Children/Campaign For School Dropouts’.
Ka jingthmu jong kane ka prokram ka long ban pynshai sha ki khynnah halor ki hok jong ki bad kumjuh ruh ban pynduna ïa ka jingpep skul shipor jong ki khynnah.
Ha kane ka sngi, ki riew shemphang napoh ka ophis DLSA West Khasi Hills District, ki nongmihkhmat na ka tnad DSEO, Labour, ki la wan ban ai jingkren bad pynshai paidbah halor ki mat kiba kongsan kiba ïadei bad ka Free Legal Aid Services and functioning of DLSA and Prohibition of Child Marriage Act, 2006, Right of Children to free and Compulsory Education Act, 2009 and Mid Day Meal Scheme, NALSA (Child Friendly Legal Services to children and their Protection) Scheme 2015, bad ïa ka Child Labour (Prohibition and Regulation)Act.
Ha kane ka prokram la wan ban sakhi da ki nongshong shnong jong ka Shnong Lawbyrtun bad ka la don ruh ka jingïa phylliew jingmut hapdeng ki nongshong shnong bad ki riew shemphang, kaba la wanrah shibun ki jingtip bad jingmyntoi ïa baroh kiba la wan ban ïashim bynta.
