Shillong, Jylliew, 04: Ka shnong Kynshi Bangla ka dei ka shnong kaba ju mad bha ki jingjulor ha ka jingwan lynshop jong ki bor ka mariang khamtam haba la dei ka aiom lyiur.
Kane ka shnong kaba hap hapoh u pud u sam jong ka Eastern West Khasi Hills District, ka dei ka shnong kaba ju mad ïa ki jingshlei um jong ka wah Kynshi kaba ju tap wat ïa ki surok bad ïa ki lynti ki syngkien.
Khnang ban ïarap ïa ki paidbah, ha kine ki khyndiat sngi ka kynhun Search and Rescue Team (SRT) jong ka Meghalaya Fire and Emergency Services, Eastern Range ka la ai jing hikai ïa ki nongtrei mon sngewbha jong ka shnong Kynshi Bangla kumno ban ai jingïarap ïa ki paitbah haba wan jia kino kino ki jinglynshop jong ki bor ka mariang, la ka long kum ka jingshlei um, ka jingkhie u jumai uba jur, ka jingkhie ka eriong erngit bad kumta ter ter.
Ha kane ka jingai jinghikai kaba la pynïaid da ka District Disaster Management Authority (DDMA) la pyni nuksa ruh kumno ban pyndonkam ïa ki tyllai, ïa ki dieng ki siej lane ïa kino kino ki tiar kiba per ha sla um.
Nalorkata, kane ka kynhun ka la ai jinghikai ruh kumno ban ring mynsiem hapoh um da kaba pyndonkam da ki tyndong lyer bad kiwei kiwei de ki jingai jinghikai.
