Ha kine ki sngi ki don satang khyndiat kiba dang sngewtynnad bad pynmlien ban shong kulai

Nongstoiñ, Ïaïong 08: Ki kulai ki dei ki mrad ba ki longshuwa man shuwa naduh hyndai hynthai ki ñiew kor bha bad kiba la pyndonkam da ki shipai haba ki ïaleh thma, hynrei katba ka por ka nangïaid ka jingpyndonkam ïa ki kulai ka la sdang ban duh syndon.
Haba phai ha West Khasi hills ki don satang katto katne ki jaka kum ha ki thaiñ Byrki, Mawdoh, bad katto katne ha ki thaiñ Umyiap hynrei napdeng ki nongshong shnong kiba dang ri kulai don tang uwei u rangbah na ka shnong Mawïawet kaba don ha ka thaiñ Umyiap West Khasi hills uba naduh dang khynnah u long uba tbit haduh katta katta ban shong kulai bad u la ju leit ban ïashim bynta ban pynmareh kulai ha man la ki tamasa ba pynlong da ka sorkar bad kiwei kiwei ki kynhun.
Nalor kata u ha man la ki tamasa kiba don ki jingpynmareh kulai ym pat ju don kiba lah ban knieh ïa ka kyrdan ba nyngkong. Haduh kine ki sngi utei u rangbah u don ki kulai kiba biang bha ban pynmareh thong. Kaba kham sngewtynnad ka long ba u khun khatduh jong u ryngkat bad uwei u khun ksiew man la ka janmiet haba ki lait ki ju pynlut por ban praktis shongkulai da kaba pynmareh ha ki surok bad lynti shnong.
Haba peit ïa kitei ki khynnah ha ka por ba ki shongkulai bad ki pynmareh ha ki lynti shnong ym idei shuh ban ong ba ki dei ki khynnah nongkyndong hynrei la idei ban ong ba ki lah ban dei ki khun jong ki Cowboy kiba shong ha ki ri sepngi. Haba ïakren bad kitei ki khynnah ki la ong ba haba ki shong kulai kam dei tang ba ki sngewtynnad hynrei haba ki la pynmareh sted bha ïa ki kulai ka dei ka exercise kaba bha tam ïa ka met ka phad bad ka jabieng ka pyngngad.
Ki la ong ruh ba ka long ruh kum ka jingpynmlien bad praktis ruh ïa ki kulai ba kin mareh. Ha kajuh ka por ki la ong lada ïa ki kulai la shu set tang hapoh sem ne shu pyllait lan lada shong bad pynmareh tang teng khat haba ka rukom mareh kam sngewtynad satia hynrei lada pynmlien man ka por haba shong bad pyn mareh ka jlih bha. Kitei ki khynnah ki la ong ruh ba haba donkam ban leit jingleit da u kulai ha ki jaka kiba hapoh sawphew kilomitar kan shim por la kumno kumno tang arkynta shiteng kata lada dei ki kulai kiba kham tlot bad ki bym pat hikai bha kumno ban mareh hynrei lada ki dei kulai kiba khlaiñ bad kiba biang bor kiba la hikai bha ban mareh kan shim por tang kumba ar kynta duna hynrei lada la palat ïa ka sawphew kilomitar ka kham lah ka kali.