Shillong, Risaw 19 : Ka United Democratic Party (UDP) ka shaniah ha ki nongïalam na rilum Garo la ka party kan pynieng kyrtong neem ha ka elekshon shiteng samoi na Gambegre constituency kaban long ha ka 13tarik u Naiwieng mynta u snem.
Haba kren bad ki lad pathai khubor hynin ka sngi, u General Secretary ka party, Dr. Jemino Mawthoh haba kren sha ki lad pathai khubor u la ong ba halor katei ka elekshon shiteng samoi ki nongïalam ka party na riewlum Garo kin sa phah ïa ka kaiphod sha ka party la ka long ne kam long ba kin sei kyrtong.
“Ka jingïoh vote (vote share) ha Garo Hills ruh ka biang bha bad ngi don ka jingkyrmen ba ngin lah ban leh bha hangtei ruh,” ong u General Secretary ka Party.
Kumba long haduh mynta hi, ki party kiba la pyntikna ban aireng ha kane ka elekshon ki kynthup ïa ka kyrtong jong ka NPP ka Dr. Mehtab Chandee A Sangma kaba dei ruh ha kajuh ka por ka kurim jong u Myntri Rangbah ka Jylla.
Nangta na ka All India Trinamool Congress (AITC) ka la pynieng da ka MDC jong ka Garo Hills Autonomous District Council (GHADC) na Dengnakpara ka Sadhiarani M. Sangma kaba dei ruh ka kurim jong u MLA barim ka Rangsakona u Zenith M. Sangma.
Nangta na ka Congress pat ka la sei da u Jingjang M Marak, u ba dei ruh ha kajuh ka por u paralok ba jan tam jong u MLA barim bad MP ba mynta ka Tura, U Saleng A Sangma.
Lah ban kdew hangne ba ïa ka Gambegre Constituency la mihkhmat da u Saleng A. Sangma hynrei hadien ba u la jop kum u MP ba thymmai ka Tura u la resaiñ noh kum u MLA.
Haba pyrshang pat ban ïa kren bad ki nongïalam ka BJP Meghalaya ki la ïathuh ba ki pynkhreh ban aireng lang ha kane ka elekshon shiteng samoi tangba ïa ka rai ba khatduh kan dei ha ki bor bahalor jong ka party.
Watla ka elekshon shiteng samoi ha katei ka constituency ka sah mynta sa tang kumba shi bnai duna hynrei ym pat lah pat ban ong sa katno ngut ki kyrtong kiban mih namar ki dang don bun ki party ba don ha ka jylla kiba khlem pat ai dak la kin sei kyrtong neem. Nalorkata, khlem pep kin don ruh ki kyrtong shimet kiban mih ban aireng lang.
Haduh mynta hi, ka NPP kaba don da ki 31 ngut ki MLA ka ap kmang ba lada ka jop kan sa kiew sha ka 32 ngut ki MLA. Katba ka Congress kaba sah sa tang uwei u MLA ka don ka jingkyrmen ba lada ka jop ha katei ka elekshon shiteng samoi ka jingdon ki MLA kan kiew sha ka 2ngut.
Hynrei haba phai pat sha ka Trinamool Congress lada ka jop ha kane ka elekshon, ka jingdon ki MLA kan kiew sha ka 6 ngut.
