Selsella, Nailar, 11: U Myntri Rangbah ka Jylla u Conrad K. Sangma ha ka sngi Palei u la buh ia u mawnongrim ban tei ia ka Sub-centre ba thymmai ha ka shnong Chambagre kaba hap hapoh ka Selsella C&RD Block, West Garo Hills ha ryngkat ka jingsakhi lang jong ki MLA kiba kynthup ia ka Ferlin Sangma, u Thomas Sangma bad u Marcuise Marak.
Ha ka jingbuh ia u mawnongrim ban tei ia ka Sub-Centre, kaba long shi bynta jong ka Model Health Sub-centre, u Myntri Rangbah u la ong ba ha ki lai snem ki ban sa wan kumba 300 tylli ki Sub-centre ba thymmai yn sa tei ha ka jylla baroh kawei.
U Myntri Rangbah u la pyntip yn sa mang pisa T.165 klur na ka bynta ban shna ia kine ki Health Sub-centre ba thymmai.
“Da ka shong ban pynjanai ia ka koit ka khiah ha ki shnong nongkyndong jong ka Jylla, ka Sorkar ka la rai ban pynkhlaiñ shuh shuh da kaba wanrah ia ki projek ki ban pynthikna ba ki jaka ai jingsumar ha ki shnong nongkyndong kin long kiba biang,” ong u Myntri Rangbah.
Ia ka Sub centre ha Chambagree la tei ha kata ka rukom ba kan long kaba neh, kaba lah ban shan lada wan ki bor lynshop ka mariang bad kaba khuid ba suba.
Ia kane ka projek la pyntrei da ka Sorkar Meghalaya ha ryngkat ka jingiaitreilang bad ka SELCO Foundation and Saura Mandala.
U Myntri Rangbah u la ong ba kine ki jaka ai jingsumar ba thymma ha ka jylla kin long katkum kane ka juk mynta ha kaba yn sa buh ia ki kor ki bor ban sa pyntreikam pura.
U la ong ruh khnang ban pynkhlaiñ ia ki jaka ai jingsumar ha ki shnong ki thaw, ka Sorkar ka la pynkup bor ia ki shnong lyngba ki Village Health Council.
U Sangma u la iathuh ba hapoh ka Meghalaya Health Infrastructure Strengthening Project haduh T.350 klur la mang pisa ban kyntiew kyrdan ia ki PHC bad ia ki CHC ha ka jylla.
Haba pynpaw ba la donkam ia ki nongtrei kiba la tbit bha ha ka koit ka khiah, u Sangma u la ong ba ka jingtrei kaba T. 280 klur ia ka PA Sangma Medical Skill Hunar Hub la sdang ha Dumindikgre kaba don hajan Babadam, West Garo Hills.
Nalor kaba pynsngew ruh ia ka jingkyrduh ki nongtrei kiba la kham tbit ha ka koit ka khiah ha ki shnong nongkyndong, kane ka lad ba thymmai jong ka Sorkar kan sa plie kabu ruh ia ki samla wadkam kiba la nang la stad, la ong shuh shuh u Sangma.
