Shillong, Risaw 19: Ki Autonomous District Council (ADC) ka Meghalaya ba kynthup ka Khasi Hills Autonomous District Council (KHADC), Garo Hills Autonomous District Council bad ka Jaintia Hills Autonomous District Council (JHADC) mynta ka sngi Palei, ki la shim ïa ka rai ban pyntreikam noh ïa ka Digital India Land Record Modernization Programme (DIRLMP).
ïa kane ka rai la shim ha ka jingialang hapoh ka ophis treikam jong ka tnat Land Resources jong ka Ministry of Rural Development ka Sorkar Pdeng ha nongbah New Delhi.
ïa kane ka jingïalang la pynlong na ka bynta ban buddien ïa ka jingïalang ba la pynlong ha ka 3-4 tarik Jymmang 2023 halor ka Riti dustur, ki aiñ tynrai, ki aiñ ba mynta bad kiwei kiwei ki kam ba ki district council ki shim.
Kum shi bynta ban buddien ïa kane ka jingïalang, u Executive Member (EM) ka KHADC ba khmih ïa ka land bah Teibor Pathaw ula lum ïa ki dkhot ban kynduh ïa u Joint Secretary ka tnat Land Resources jong ka Ministry of Rural Development ka sorkar pdeng ha ka 10 Nailar 2023 bad ha kane ka jingïakynduh la ai jingmut ban pyntreikam ïa ka DIRLMP.
La bthah ruh ïa ki ADC ba kin ïatreilang bad ka tnat Directorate of Land Records, Shillong ha ka ban pynbiang ïa ka jingtyrwa bad ban aiti sha ka sorkar jylla lyngba ka District Council Affairs (DCA) bad sha ka tnat Planning ban ïoh jingmynjur.
U Secretary ka Ministry of Rural Development Ajay Tirkey ula kyntu ïa ki jylla ka thaiñ shathei lam mihngi (North East) ba kin pynsted ha ka ban treikam lyngba ki kor Computer.
Ula pyntip ba haduh 95% ki jaka ki dei kiba la pynrung ha ki kor computer (digitalized) hynrei ka 5% kaba sah ka dei ha ka thaiñ Shatei Lam Mihngi ka Ri. Ula pynpaw ïa ka jingdonkam ba ki ADC jong ka thaiñ kin jam lang ha kane ka lynti ban don noh ïa ka rukom khmih ïa ki jaka puta kat kum kane ka juk ba mynta.
Naka liang ki dkhot ka GHADC ki la pynpaw ïa ka jingdonkam ban pynsngewthuh paidbah haba ïadei bad ka jingbuh jingthoh noh ha ki kor digital ïa ki jaka puta.
Naka liang ki dkhot ka JHADC ki la pyntip ba ka district council ka la iaid shakhmat ban lum jingtip ïa ki jaka puta lyngba ki kor GPS Technology.
Naka liang u EM ka KHADC ula pyntip baka district council ka long kaba la pynkhreh ban pyntreikam ïa ka DILRMP namar ïa ka jinglum jingtip halor ki jaka puta la bsuh lang hapoh ka Khasi Hills Autonomous District (Regulation and Administration of Land) Act 2021.
