Ha ki DC yn buh pisa lypa ka sorkar ban ïarap ïa ki lanot lyngshop mariang

Shillong, Nailur 13 : U Myntri Rangbah ka Jylla, Conrad K Sang ma ha ka sngi Ba-ar u la ong ba ka sorkar jylla ka thmu mynta ban buh pisa lypa ha ki Deputy Commissioner khnang ba kin lah ban leit ai jingïarap mardor sha kito ki longiing kiba kynduh ïa ki jingjia shah lyngshop mariang.
U Myntri Rangbah u la pyntip ruh ba ïa katei ka mat ïa kren, ka la mih ruh ha ka jingïalang bad ki Deputy Commissioner kaba long dang shen.
“Ha katei ka jingïalang, ngi la shim ïa ka rai ba nalor ka 25lak tyngka kaba dei na ka bynta ban ïarap salonsar, ka don ruh ka jingdonkam ban don katto katne ka pisa ban buh lypa bad ki DC khnang haba don kino kino ki longiing kiba shah pynjulor ha ki bor ka mariang ki paidbah kin ym donkam ban da ap slem slem,” u la ong.
“Kumta, kane ka kam mynta ka dang don ha ka jingpyrkhat kumno ban leh khnang ba yn dup lah ban buh katto katne ka pisa bad ki,” bynrap shuh shuh u Myntri Rangbah. U la pynpaw ruh ba kam dei satia kaba sngew ïahap ba ki paidbah ki hap ban ap haduh 2 snem ba kin ïoh ïa ki song jingïarap na ka bynta ki iing ki sem jong ki.
Shwa kane, u Myntri ka tnad Revenue & Disaster Mangement, Bah Kyrmen Shylla u la ong ba ki la don haduh 187 tylli ki longiing kiba la shah pynjulor ha ki bor ka mariang kaba la wan ban syllad ha u Ïaiong mynta u snem ha Bhoirymbong Block.
U ong ruh ba ka jingjulor ka la poi haduh kumba 13.94 lak tyngka ha kaba 8.79 lak la dep ban pyllait bad kaba sah pat 5.15lak tyngka ka dang sah ban siew sha kitei ki longiing kaba ki thmu ban pyllait noh hadien ba ki la dep ban shong ïa ka jingïalang kaban long shen.
Halor ka jingpyntip na u MLA ka Mawsynram, Bah HM Shangpliang ba ka don ka jingpynslem ban pyllait ïa ka song jingïarap sha kito ki lanot ba shah ktah ha kitei ki jingjia, utei u MLA u la ong ba ki la don palat 200 tylli ki kyrteng ba la phah da u BDO ka Mawsynram sha ka Disaster Management hynrei haduh mynta kim pat pyllait satia ïa ka pisa.
“Nga kyrpad ïa u Myntri ba un shimkhia mardor ïa katei ka kam khnang ban pyllait noh kham kloi ka pisa sha ka distrik bad sha ki Block namar bun ki paidbah ki dang ap khmih lynti ban ïoh ïa ka jingïarap. U Myntri Rangbah u la ong ba un sa leh noh kham kloi katba lah hynrei ha kane ka bynta dei ki paidbah kiba ngat,” bynrap biang u MLA.
Na ka liang u Myntri u la pyntip ba ka sorkar kala dep ban pyllait haduh 1.36 klur tyngka na ka bynta ka East Khasi Hills District marwei bad haduh mynta ki la dep ban pyllait haduh 50.20 klur tyngka sha ki DC bapheer bapher ban pynpoi sha ki song jingïarap sha kito ki lanot lyngshop mariang.