Nongpoh, Nailur 07: Ki shipai jong ka Border Security Force (BSF), Meghalaya Frontier ka la pynbna paidbah ba kan pynlong ïa ka jingthep kam ïa ki samla trai muluk na ka bynta ka post Constable (General Duty) bad katei ka jingthung kam kan long kyrpang tang na ka bynta ki samla trai muluk (Schedule Tribe) jong ka jylla Meghalaya kum ka thong ban ailad ïa ki samla trai muluk ban rung ha ka kam shipai.
Ïa ka rally yn pynlong ha ka 12 tarik Nailur 2025 ha Umling, Umsning, Jirang bad Bhoirymbong Block jong ka Ri-bhoi District.
Kane ka jingthmu ka long ym tang ban ai lad ïa ki samla shynrang bad kynthei na ka Jylla hynrei ban pynthikna ruh ïa ka jingmihkhmat jong ki samla na ka jylla Meghalaya ha kawei na ki kynhun shipai ba pawnam jong ka ri.
