Shillong, Risaw 07 : U Myntri ka sorkar jylla ba dei ruh u MLA ka Pynthorumkhrah, Bah AL Hek ha ka sngi Nyngkong u la ong ba ka jingshna ïa ka jingkieng kaba don hajan ka skul BDW International School ha Nongmensong ki buh thong ban pyndep noh ha ki 4-5 bnai.
“Ngi la dep ban khot ïa ki engineer hynin ka sngi bad baroh ki la wan ban jurip lang sha katei ka jaka. Ki buh ban pyndep ïa katei ka jingkieng ha ki 4-5 bnai,” ong u Myntri haba kren bad ki lad pathai khubor.
Dang shen, na ka liang ka Shillong Traffic Police ka la pyntip ha ki social media ba katei ka jingkieng kaba dang shna thymmai hajan ka skul BDW ka la don ïa ki dak orpait bad ka don ka jingsyier ban ïaid kali. Ki la kyntu ruh ba na bynta ka jingshngaiñ ki paidbah la khang shipor ïa katei ka surok.
Haba jubab halor kane, u Bah Hek u la ong ba katei ka jingkieng ka dei kaba dang don hapdeng ka jingtei bad ruh ba kam dei satia ka jingkieng jingkieng heh.
“Mynta ka sngi nga la kren bad u Chief Engineer, ïa ki engineer bad SDO ban pynkloi mang pisa namar katei ka surok kadei kaba kongsan bha bad donkam ban pynbha kham kloi,” u la ong da kaba bynrap ba ym shym la khang satïa ïa katei ka surok.
